Theatrum stultorum

[p. 128]

Stvltitia
Avarorum.

Emblema.
Porcus in igne jugulatus.

Dum ardet, arridet.
Ad Boëth. Met. 3. lib. 2.

SEtiger Porcus, Cereri sacratus,

Vivus displicet omnibus.

Pulte se foedus madidâ saginat,

Bulbum, stercora devorat.

Ast ubi pinguis jugulatus ardet,

Arridet caro coctilis.

Rusticus pernas salit, ac amicis

Mox farcimina conficit.

Si nates mundas cupit osculari,

Utrem pupulus obtinet.

Euclio porcus sit Avarus omnis;

Nulli vivus amabilis.

Dives est nummis, locuplesq́ue, mille

Terrae jugera possidet.

[p. 129]

 

Pulte solatur stomachum latrantem,

 

Libo cum sale vescitur.

 

Pauper immensum gemit inter aurum,

 

AEris grunnit ut indigus.

 

Non places vivus, moriare Stulte;

 

Mortem filius expetit.

 

Mortuus flavis loculis placebis,

 

Fies mortuus optimus.

 

Arca quae gazas rutilas flagellat,

 

Nomen reddet amabile.