Theatrum stultorum

[p. 91]

Stvltitia
Parentum proli nimis indulgentium.

Emblema.
Simia catulos tenaciter nimis amplectendo, enecans.

Coecus amor nullum novit habere modum.
Tibull. lib. 2.

QVid rerum video, Simia, Simia?
Parvos heu! catulos impia strangulas;

Metam excedis amoris,

Mater desine, deprecor.

Amplexus catulos enecat hic tuos;
Prolem, stulta, nimis pectore comprimis;

Discas mater amare,

Foetum dilige mitiùs.

Illud prototypon crede parentium,
Plus justo sobolem qui modò diligunt;

Figunt oscula mille,

His quidquid libet annuunt.

[p. 92]

 

Multùm, crede mihi, desipis, ô Parens:

 

Quando tam tenerè diligis, enecas;

 

Tanti desine amoris,

 

Frenos injice basiis.

 

Sed frustrà loquimur; fabula mortuo,

 

Aut surdo canitur: rebus in omnibus

 

Nullum novit habere

 

Matris coecus amor modum.