Un selekshon di palabra i ekspreshon. Deel 2

Sinónimo, homónimo, antónimo

Blo

Blo bashí (plan barí).

Yanshi no ke dunami un blo (un luf, un chèns).

Ta blo si bo kaba bo trabou trempan (solamente).

Weis a blo riba mi (reis di gòlpi, di ripiente).

E mucha ta kana blo sunú (kompletamente).

Bo ta blo papia pantomina (konstantemente).

Djis

Djis akí Manuel ta yega (pronto).

Te djis (akí), (te pronto).

Ta djis un krenchi loko e ta (mashá nada).

Djis mira e asuntu akí pa mi (rápidamente).

Ata, at'é

Ata! (ku aksènt riba e promé sílaba): Tuma! (entregando algu).

Ata! (tur dos vokal ta zona un poko mas largu ku esun ariba: ekspreshon di sorpresa o sustu.

At'é: 1. Ata el a yega, ata e kos.

2. Ekspreshon di desepshon, asombro, sorpresa o admirashon. Tambe sa uza ‘ata’ pa ekpresa sorpresa.

Drechi, derecho, derechitu

No buska mi drechi (no buska pa sa mi asuntu).

Drechi! (B'a buska, b'a haña. Drechi!)

Un obrero mester konose su derecho, pero su deber tambe.

Sixto a kana derechitu bai kas (un liña batí).

Lomba, lombe

No subi mi lomba (no benta falta riba mi, no abuza di mi).

Biba tras di lomb'i Dios (den kul di mundu, mashá leu na un lugá

[p. 48]

solitario, den chokamata).

Bira lomba pa mundu (no preokupa mas ku kos di mundu).

Bira lomba pa un hende (no yud'e o sosten'e mas).

Lomba di baul ta meskos ku lomba di morkoi o lombe.

Awor ku nos ta kla ku e trabou aki, nos por bisa ku e ta tra'i lomba.

Muchu, hopi, mashá

No tin muchu ora ku el a sali bai (hopi).

Mi ta mashá kansá (den e frase aki mashá ta un adverbio).

Dois tin hopi kabritu (aki hopi ta un adhetivo).

Fanchua tin mashá hopi kas (mashá ta adverbio, hopi ta adhetivo).

Ma ta muchu no! (ta di mas!)

Mi tin muchu ko'i hasi (demasiado).

Tin yen di hende ta kere den web'i gai (aki yen ta nifika hopi).

Ora

Or'asina akí (na e momentu akí) lo e ta na kas kaba.

Esta malora! (esta baina).

Mi ta bini mesora (inmediatamente).

Un ora pa otro (un momentu pa otro) nan por kana yega.

Malora ta na kurp'i palu (desgrasia no sa ta leu).

Basta ora mi ta sinta warda (basta ratu).

Mani sa gusta yega na ora oradu (na último momentu).

Ora el a bisami, ya tabata lat kaba.

E mucha no ta dunami or'i porta (e no ta dunami un momentu di sosiegu).

E sèn di briyèchi a yega na or'i mesté (nèt na momentu di nesesidat).

Su señora tabatin un bon ora (bon parto).

Diamars tin tres or'i malora (diamars ta dia di mal sueltu).

Palabra

Benacio ta hòmber di su palabra (si e priminti algu, e ta hasié).

Marka mi palabra! (paga tinu, e kos ei ta sosode manera m'a bisa).

Angelina tin palabra na ora (asina bo bisa algu, e tin su kontesta kla).

Ningun hende no ta lanta su palabra fo'i suela (o fo'i tera): ningun hende no ta reakshona riba loke e bisa.

Ata palabra! (eksaktamente!).

E no a bisa ni un pi'e palabra (nada).

E palabra tabata na mi punt'i lenga (mi tabata seka di papia).

Gai

Martins ta gai bibu (sabí, gato, djispou).

Esei no ta ko'i kanta gai (o kanta makamba): No ta gran kos.

Felipitu ta bon gai (bon tersio, e no ta pichiri).

Tende un kos akí, gai (bru, suá, tersio).

[p. 49]

Ata nan ta mama bo gai (tumabo hasi sokete).

Si bo a uza bo sintí, anto ta otro gai lo a kanta (anto e resultado lo tabata diferente).

Manuel ta gai di mardugá (e ta lanta mashá trempan).

Pa bo tira un skopèt, bo mester hala su gai.

Dia

Ladron a hòrta didia kla.

Kiko dia ta bisa? (ki notisia tin?)

Riba un bon dia lo sali na kla ku bo tabatin rason (riba un dia den futuro).

Mani por kana yega un dia pa otro (por sper'e tur dia).

Warda numa, mi dia t'ei (mi dia di bon o di bengansa tambe lo yega).

Dia ta bai kai (ta birando lat).

Rabia, djigel, bedèm, hostiná

Ta rabia bo tin, pasobra bo n' por mira ku mi ta den bon.

Mihó rabia ku duele (mihó bo tin rabia riba mi ku bo tin duele di mi).

Reis manera djindja (rabia i kunsumi te kasi rementa).

Bira djigel (rabia, bira bedèm, hostiná).

Bo sanger ta herebe ora bo kunsumi.

Un hende ku sanger na wowo ta esun ku ta kapas di hasi ki ku ta ora e rabia.

Kalitu por a bebe su sanger pa awa (e por rementa di rabia).

Ora bo ta balente rabiá, por bisa ku b'a bira hodidu o bestia.

Fututu, diguidigui, fregou, riba duru

Awe kos ta fututu (kos ta malu, mi ta baítu, bashí, sin mod'i muri).

Kos ta diguidigui (mi no tin plaka o nogoshi a bai malu).

Krus t'abou (mi no tin ni kuminda ni plaka).

Tin Wansitu riba mesa o Wansitu a subi mesa (no tin mas kuminda).

Mi ta riba duru (blo bashí, plan barí, sanka na man).

Situashon ta fregou (malu).

Kinikintèr, kaweta, kurioso, mishirikeira, letrá

Un hende muhé letrá ta un ku ta gusta hasi redu i papia riba otro hende (Un mishirikeira ta meskos).

Kaweta ta sinónimo pa kurioso, aunke nos ta uza kaweta ku e sentido di despresio. Bo por zundra un hende pa kaweta, pero no pa kurioso.

Un persona kiníkintèr ta esun ku ta mete den asuntu di otro hende.

Bientu, airu, rosea, brisa

‘Bient'i ost baldadi’ ta e nòmber ku Luis Daal, nos rei di metáfora, a duna e bientu ku konstantemente ta supla fo'i direkshon di Ost.

Bient'i kuaresma o bient'i seka maishi ta e bientu fuerte ku sa tin den luna di mart.

[p. 50]

Bient'i awa ta esun ku bo ta sinti supla djis promé ku awaseru kuminsa kai.

Saka bientu (lanta rabu, saka puya).

Si ta hasi kalor, nos ta sali keiru pa kwe poko bientu (airu).

Aire (airu) ta e substansia gaseoso (un meskla di oksígeno i nitrógeno) ku tin rondó di mundu.

Un persona ku mal airu (aire) ta esun ku no sa kon e mester komporta, un hende ku mal moda o mal manera di trata.

Den un kamber horná no tin airu fresku.

Tin un warawara ta bula te den laria ayá.

Hende, bestia i mata ta hala rosea.

Mi ke haña un rosea (un luf pa sosega poko).

Pará mainta trempan banda di laman bo por gosa un brisa fresku.

Den mas brisa mas gòdèm (den difikultat i problema bo ta lucha ku mas forsa i energia).

Flaku, delegá, seku, leguede, tabl'i strika, tizgá, lesma

Un persona delegá generalmente ta bon formá, pero no flaku.

Flaku sinembargo ta duna impreshon di wesu ku a kuminsa sali.

Nos por bisa ku un hende ku a tene dieta a bira delegá, pero un ku tabata hopi malu a bira flaku.

Seku ta muchu mas fuerte ku flaku; e ta implika ku un persona ta kasi kuero ku wesu.

Un tabl'i strika ta un persona ku no tin ni dilanti ni patras.

Tizgá ta ainda mas fuerte ku seku (mas o menos kueru ku wesu).

Un hende lesma ta un persona flaku i floho. Por uz'e tambe pa un persona tenchi i delikadu. Sa uza tenchi tambe pa e persona ku tin un miedu eksagerá pa e no bira ferkout, dal su dede o raska su kurpa.

Lèguèdè (di origen Haitianu!) ta un persona seku, un tabl'i strika.

Gordo, yen, bashá, mal yená, huda, pòtòpòtò

Si nos bisa ku un persona ta yen, esei ke men ku su kurpa ta bon formá i un krenchi gordo.

Gordo, en kambio, ya ta demostra ku un persona a pasa loke por konsidera normal pa su tamaño.

Bashá o mal bashá ta implika ku e gordura ta duna apariensia físiko poko deformá. Mal yená (un huda mal yená) ta nifika ku e diferente partinan di un persona su kurpa no ta na proporshon (pasobra muchanan, ora nan ta traha un huda, no ta paga tinu pa yena pia, man, pechu i barika dje huda na proporshon).

Por uza pòtòpòtò pa lodo, pero tambe ta un hende gordo ku su gordura ta kologa na su kurpa.

Maka, triki, buelta, maña, saber

Un outo o un mashin bieu sa tin su maka (kisas mester konopa waya

[p. 51]

p'e start o hasi kualke otro maniobra straño promé ku e kuminsa traha).

Tin hende ku sa hopi triki ku karta. Un persona ku mashá triki ta un djispou ku sa di saka su kurpa for di tur problema.

Un tersio ku konose su buelta di atras tin su manera bibu di salba su situashon.

Buriku bieu sa tin su mal maña. Buriku bieu n' sa laga su maña (un hende por bira bieu, pero sin lubida su mal ehempel).

Si bo no tin saber (konosementu) di e fishi di karpinté, no purba traha un kas di tabla.

Leba, fuku, mapro

Un leba ta un persona ferfelu o pomperu ku ta stroba un kaso ku su presensia. No hisa leba pone riba bo lomba (no mete, forma amistat o kasa ku un hende ku lo okashonabu tristesa i problema).

Si un number tin fuku (si e ta fukíá), nunka e n' ta sali. Laga di ta fukia hende! (laga di ta mara hende).

Mapro ta meskos ku leba; ke men un hende ku ta buta un akshon frakasa pa motibu di su presensia. Tambe nan sa uza mapro pa indika ku un artíkulo no ta sirbi, ku e ta porkeria.

Pelchi, pulchi, píldora

Hopi remedi ta trahá na forma di píldora, na diferente tamaño i koló. Un pulchi ta un remedi na puiru, lorá na un manera espesial den un envelòp chikí.

Bo tin ku guli (traga) bo pelchi (bo mester pasa den e situashon desagradabel, bo mester asepta e sirkunstansha amargo).

Punto, punta, pui

Nos ta saka un pòtlot su punta, pa skibi kuné.

Suku kushiná ta kue punta na momentu ku e ta kuminsa bira duru, pa por traha dushi o kakiña kuné.

Riba fiesta di risibimentu tin hopi hende sa kana piki punta (kana pasa na kada kas ku tin fiesta pa bebe i kome).

Un persona na su punto ta un hende mashá eksakto.

Seis or' en punto (eksaktamente seis or).

Por pui un hende ku algu ku tin punta skerpi, i ku palabra tambe.

Ròshi, rébusak, kaska ròk, duna un soyá, zundra, rous

Rous: kòrta un hende su kurpa ku palabra, rosponde na un manera antipátiko i brutu.

Ròshi: kaska ròk, rébusak, un Soyá di palabra, duna un soyá.

Zundra generalmente tin un balor mas rudo, mientras ku kanga saya i lastra ta ainda mas fuerte ku zundra.

[p. 52]

Shuri, shouru, bandidu

Hende barata, sushi, mal eduká i degenerá nan sa yama shuri (populacho, plebe).

Shouru i bandidu por tin tantu nifikashon di apresio (bon) komo di despresio (malu). Un persona ku ta kana lastra riba kaya, bringa, hòrta, echa baina por ta un shouru o bandidu. Pero un tata o mama por yama su yu: Mi shouru, bandidu dushi i bunita! (aki no tin nada di despresio).

Trèntu, dúndula, tete, talanzá, belenkiá, balia keke

Si un hende ta kana bai bini sin ningun propósito fiho, e ta trèntu.

Pero por uz'e den e siguiente sentido tambe: Un mama ta masha kansá di tantu Trentu (bai bini), ke men di tantu kana, pero no sin propósito fiho, al kontrario, pa hasi trabou.

E yònkuman tabata dúndula dilanti dje galiña su kas (kana bai bini).

Si bo ta tarda pa bini kla ku algu, bo ta tete. Un hende malu, enfermiso o mankaron ta kana tete den kaminda, sin por bai dilanti lihé, pasobra su pianan no tin forsa.

Bo ta tira tèk ora bo ta kana bai bini siertu kaminda i ku siertu intenshon.

Talanzá ta tarda pa hasi algu pa motibu di flohera o debí na indesishon.

Si un mucha ta bula bai bini alegremente e ta belenkiá.

Esun ku ta bula balia sin por sinta ketu ta manera un keke. (pa hende ku no por sinta ketu nan sa bisa tambe ku e tin wangui).

Wiri, wiriwiri, wiki, kiriwichi, wèrki, filingrana

Wiri:

1.	instrumènt di metal pa kompañá (por traha wiri tambe ku kaska di un sorto di kalbas largu - no esun di kome -).
2.	sobrá di diferente sorto di bibida stèrki for di varios bòter ku e shaperu ta basha huntu den un bòter i bende despues pa hala kurpa.

Wiriwiri ta pan garná (wiriwir'i pan).

Filingrana:

Kibra por ehèmpel un glas na filingrana (na hopi pida chikí). Nos por bisa tambe kibra na wèrki.

Un sneiru ta hala wiki ora e ta hala tur e hilunan di un pida tela.

Kiriwichi:

1.	Hende sa saka kiriwichi (sobrá di kuminda) fo'i meimei di nan djentenan.
2.	Si un hende porko no limpia su atras drechi ora e kaba, e ta haña kiriwichi (pida-pida chikí) di pupu na su kurpa.
	Mester a pone e splikashon akí na un manera kla, pasobra hopi be

[p. 53]

nos a tende nan uza kiriwichi na lugá di wiriwiri; meskos nos a tende nan uza wiriwiri ora nan ker a men e wiri pa toka.

Zjoli, djèm, kuki, vak, hehéhe

Esaki ta su zjoli (su kuki, su djèm) (ta nèt loke e ta gusta mashá). Si un persona bisa ku algu a kai net den su vak, esei ta nifika ku el a haña net loke e tabatin mester.

Bo ta sintibu den bo hehéhe si bo ta mashá kontentu o di bon humor).

Kalanchá, gatia, lembe, trasta (hast trastu)

Ku palabra dushi i bon manera sa kalanchá un hende pa e hasi algu o tuma parti na kualke grupo (gatia na fini manera).

Un gatieru ta e buraché blo bashí ku ta gatia beter (trata na haña beter pornada). Sa uza e palabra gatieru tambe pa esun ku ta trata na drenta un fiesta kaminda e no ta kombida.

Un lembelansa (chupadó) ta esun ku ta papia bunita ku palabra dushi i suave, pa adulá un persona i dje manera ei logra saka algu (un lembedó).

Un persona ku trastu ta un lembelansa, papiando na un manera falsu i eksagerá den kara di esun ku e ke dal abou.

Makistá, hinka palu bou di kandela, hinka den barik'i otro

Esun ku pone desunion den dos persona a makistá nan.

Hinka palu bo'i kandela: Buta un desunion o pleitu entre algun persona bira mas grandi pa medio di su akshon o palabra.

Hinka un hende den barik'i otro: Pone dos hende pleita o bai na guera ku otro.

Koloktivo

Un kama di tomati, siboyo, sèldu, salada.

Un máncha di piská, masbangu, buní.

Un man di bakoba, un kachu di bakoba.

Un tròshi di uva, kashu sürnam.

Un tou di disparati.

Un trupa di sòldá.

Un harto (stèl) di ladron.

Un bònchi di paña.

Un tranzjur (kareda) di yu.

Un bóshi di kabei.

Un monton di pieda, di fruta.

Un mondi di infrou, datu, yerba stinki.

Un kuerdè (grupo, tou, stèl) di bandidu.

Un pila di hende bruá.

Un nèshi di vruminga.

[p. 54]

Ekspreshon ku sifra

No ta ún be so baka ta bai pos (mi ta bini atrobe pa pidi un fabor; e kaso ta ripiti).

Un pa dos Manuel ta rabia (e ta rabia pa kualke ko'i loko).

Pinda di un pipita (un persona kurpa chikí).

Manera dos be dos ta kuater (ku siguransa).

Den e sala tabatin dos pipit'i hende (algun).

Djamars tin tres or'i malora (ta dia di mal sueltu).

Dunami tres plak'i boka (dunami un chèns di papia).

Yora awa kuater-kuater (amargamente).

Kuater ta bela (kerementu ku tur loke ta kuater ta anunsiá o nifika morto, pasobra na morto sa tin kuater bela rondó di e kaha.

Un animal di kuater pia (un hende balente bestia i bobo).

Tur sinku dede no ta pareu (nos no ta hariña dje mesun saku).

Nobenta sèn ta seisu-riá.

Ku shete sorto (shete sorto di sensia) sa huma pa kita fuku.

Shete serbètè un tafla (un muhé ku tin yu ku diferente hòmber).

Un Buchi Wan di shete fishi (esun ku sa di tur un poko o esun ku a faya den tur).

Tur su shete sintí ta riba mi (e ta vigilami ku mashá atenshon).

Un yu di shete luna (1. un kriatura ku a nase ku shete luna, 2. un hende kurpa chikí i flakitu).

Nan a formami un shete por ocho (buskami kestion).

Hinka shete pia bou di tera (ekspreshon di un mama ora su kriaturanan ta pidi kuminda konstantemente).

Ta e mes ocho riá ta un pataka (tili komo tala, ta e mesun kos).

Dobla warda pa ocho dia (warda bo istorio largu o inkreibel, pa kont'e na un ocho dia, pasobra el tin hopi tempu.

Sinónimo i antónimo

Un sinónimo ta un palabra ku tin mas o menos o kasi e mesun nifikashon ku un otro palabra. Pero un antónimo ta nèt kontrario di un otro palabra.

Uzando sinónimo un estilo ta haña fleksibilidat i variashon. No tin nada mas laf i monótono ku tende un persona ripiti e mesun palabra konstantemente.

Un bon estilo no tin únikamente su distinshon pa medio di sinónimo, ma tambe pa medio di antónimo. Pero semper mester paga bon tinu pa e matís, di un sinónimo ta pas bon den un teksto.

Ripará e frase konosí: Kibuka ta humano, pordona dibino.

Humano i dibino ta antónimo. Butando nan dos hunto, nan ta produsi un frase sublime.

E lista di sinónimo i antónimo ku ta sigui no ta kompleto, pero simplemente pa duna un idea.

[p. 55]

	Sinónimo	Antónimo
abri	destapá deskubrí inougurá	sera tapa kubri
aktivo	vigoroso trahadó enérgiko ku brio	floho kurpa due sin grasia deshado
aplaudi	aklama aproba bati man	kondena sensura desgaba kritika
aproba	sostene favorese	desaproba kondena rechasa
arogante	orguyoso frepòstu kabes sushi	humilde sumiso mansu servil
artifisial	falsu imita falsifiká	natural legítimo
antesesor	avochi antepasado grandinan	desendiente
avansa	progresa prosede bai dilanti	retira bèk bai atras
alegre	kontentu bon genio bon beis den bo hehéhe	tristu flihí deprimi mal beis
amikal	kariñoso suave dosil bon kurason	antipátiko brutu rudo haster severo

[p. 56]

armonia	akuerdo konkordansia	diskordia bruashi
altura	elevashon	profundidat
amor	afekto adorashon kariño pashon	odio desprecio avershon rabia
algu	tiki poko krenchi ñaña	nada zupla
bunita	nèchi lulús tur afó	mahos luangu
bieu	krekeché gastá mankaron wabi fròt	hoben nobo nobís chabalitu
boroto	babel bochincha bululú beheit	kietut kalma silensio trankilidat
bon	korekto presis	malu dañá
bisti	pone hisa pone lanta buta	kita
brio	kurashi kaikai higra	kobarde tímido sokete
babuká	konfundí tolondrá boka abrí zurú zorokloko	na tinu fresku trankil

[p. 57]

bandona	laga renunsiá bira lomba pa laga na kaya	wanta tene aserká kontinuá
debil	gastá swak kansé delega (stoma)	fuerte salú duru sano
destrui	demoli kibra ruina dispidi	konstrui traha lanta edifiká
divulga	revela manifestá	skonde tapa kubri
diskordia	disonansia desakuerdo	armonia melodia konkordansia
debilita	gasta kansa	fortifika restora fortalese
duradero	permanente fiho estable konstante	temporal pasahero provisorio transitorio
drenta	pasa	sali
dushi	sut stropi	marga
derota	pèrdida	viktoria
entrada	pasashi porta	salida
enditu	meskos paresido presis	diferente distinto otro for di
enemigu	oponente adversario	aliado amigu

[p. 58]

energia	[f]orsa brio aktividat	debilidat flakesa
ekseso	ekstravagansia	ekonomia moderashon na midí
fini	delega flaku delikadu	diki brutu burusi
flaku	seku tenchi tizgá eskeleto	gordo bashá pòtòpòtò mal yená
faya	frakasa	logra shèrta prospera
fálta	defekto	ekselensia balor perfekshon
fantasia	invenshon fabrikashon kreashon mintira	realidat istoria aktualidat berdat
firme	sólido sigur konstante fiho	lòs wakamaña fleksibel wabi nankaron
franko	sihsero kurason abri	afekta hipókrita mentiroso
fertil	produktivo gordo (tera)	seku
floho	kurpa due pòrnada desinteresá	aktivo trahadó ambisioso

[p. 59]

grandi	burusí ankrá grueso	chiki pikinini ñapa
generoso	liberal	egoista
gosa	diberti saborea	sufri pasa malu
gana	logra shèrta	perdè
guera	pleitu bringamentu pelea	pas
hunta	uni djoin konopa pega	kita lòs plama
hisa	lanta eleva subi	baha
hopi	kantidat mashá muchu yen	krenchi poko tiki skars ñaña
hinka	pusha mete hende (ku kuchú)	saka ranka
inosente	kasto puru limpi birtuoso	inmoral sushi porko degenerá
irita	kishiki tuzji tenta eksita molostia	freska suavisa pasifiká trankilisá

[p. 60]

insolente	impertinente ònbeskòp fresku haster	respetuoso refina eduka
kita	lanta muf hala	pone pega mete
kome	guli hala ocha fretu moncna kremenchá	yuna pasa hamber
kontentu	alegre	tristu
kontestá	rosponde	puntra
karo	kostoso	barata regala
kapricho	kièr pretenshon lokura	opinion konvikshon
kompashon	duele simpatia	odio despresio krueldat antipatia
korumpi	demoraliá dañá	reforma purifiká
konekta	pega kombina djoin	separa kibra deskonektá lòs kita
limpi	puru nèchi	porkiá sushi
limita	redusi mará kontrae	infinito sin límite

[p. 61]

lógiko	rasonabel válido natural	absurdo ílogiko nònsèns
luho	elagansia	simplesa
lamentabel	doloroso tristu piká	alegre festivo
menshona	sita designa	omiti ignora
molostia	ferfela tormenta (tromenta) tenta heridá	kalma yuda pasifiká
neglisha	dispidi tira afó slòns	ekonomisá preserva
noble	maestoso magnífiko	insignifikante sokete chombòn (chambòn) falsu
narkótiko	anestétiko	estimulante
okupa	wanta tene	evakua laga bandona
ofensivo	repugnante desagradabet	inofensivo agradabel
obedesidu	komplasiente sumiso mansu	hostiná lantá desobedesidu
oumenta	krese desaroya multipliká intensifiká	mengua slèk redusi mèrma
prosperidat	fortuna éksito	adversidat kalamidat

[p. 62]

prinsipio	kuminsamentu start apertura	fin final klousura
purá	anshá nervioso impetuoso	deliberá kalmu pousá
refreska	rebiba	kansa marchita
rápido	purá lihé bulá bela yen ku fèrt	pokopoko slo
reuni	kolekta kongrega	separa plama
renkor	odio rabia	kompashon benevolensia
straño	singular partikular karakterístiko	komun normal konosi
skondí	tapá kubrí	ekspone kla aparente
speransa	optimismo	desesperashon
sabí	inteligente studiá brait bibu djispi	bobo estúpido ignorante tapá
sansaña	pleitu bruashi	trankilidat òrdu pas
sara	tuzji tenta kunsumi	trankilisá pasifiká kalma

[p. 63]

skual	rébusak kaska ròk ròshi rous	gaba elogia
tochi	mishi toka fula	laga para
trèk	hala ranka kobra (liña)	fir slèk
tuma	asepta guli soporta	nenga
wangalán	prizòn piskalat hotel mirashelu	---
zundra	lastra kanga saya	gaba
zeilu	kapia	kana stret
zonzo	zurú zorokloko	na tinu
we-we	beheit bochinca boroto	kietut