Un selekshon di palabra i ekspreshon. Deel 2

Lus i sombra

Sali na kla, keda skondí	Skur, sukú, skuridat
Klara un liña o un asuntu	Skur manera den barik'i baka
Pone klaridat den un kaso	Un futuro skur
Didia kla	Lus i splendor di solo
Klaridat suave di luna	Klaridat delikadu di streanan
Den sombra, den skuridat	Sukuritu (skuritu), nochisitu
Den fresku parib'i kas	Kas di lus (sentral di elektrisidat)

Ora lus a paga, nan a sinta lombra wowo den sukú. Un delait ta duna un klaridat fuerte. E kandela na mecha di un lampi di korozin ta balia den e balòn. Bisp'i nobo i aña nobo sa tin hopi fuego artifisial. Welek a kòrta, ilumina kunuku skur djis un momentu.

Bou di un palu tin sombra. Nada no ta keda skondí, tur kos ta bin sali na kla. Den un asuntu bruá mester pone klaridat. Ladronnan tabatin

[p. 22]

kurashi di hòrta didia kla den un pakus na Punda. Esun ku no studia i prepara pa despues lo tin un futuro skur. Un skuridat kompletu ta skur manera den barik'i baka.

Pober Nonato no ta ni sombra di loke e tabata. Elenita tin miedu di su sombra (mashá miedu). Ta parse ku luna yen ta buta enamoradonan merma. Solo ku sali trempan ta drenta trempan (esun ku abuza di su hubentut lo bira bieu promé ku su tempu). Porfin Toni su strea t'ariba (kos ta bai bon p'e o e tin sueltu). Ora sola baha, pero djis un krenchi klaridat keda, ta sukuritu (skuritu).

Hala un lusafè pa sende un bela. Bientu no ta paga un lanternu. Pega un kas na kandela. No tin huma sin kandela. Un vlandam di kandela ta un kandela grandi. Un bela pegá den un kándila. Su lampi ta yen (e ta kañá). Si bo waya un kandela di karbon den konfó, hopi spat di kandela ta salta fo'i dje.

Ora klaridat kuminsa mengua, ora sombranan ta drumi tur nan largu'i kurpa, ora promé strea lombra na shelu, e kriaturanan di den dia ta disparse, i esunnan di anochi ta kuminsa sali. Raton di anochi, palabrua, raton i djaka ta aparese. Nos ta kere ku raton di anochi ta gusta skuridat, pero bon mirá nan no ta bestia di anochi. Nan ora di sali generalmente ta ora bira sukuritu, i hopi di nan ta bolbe bai drumi mei anochi.

Antes den Klip nan tabata ‘kore ficho’, kargando karbonstein na makutu, pa bai basha den bapor. Pa kada biaha ku nan hasi, nan tabata haña un ficho, pa bai kobra kune despues. Bichi di kandela ta produsi un lus debil sigun e move su alanan. Un ladronchi ta un lus eléktriko ku un waya largu pa bo kana bai leu kune.

Un kustumber di promé ayá tabata gloriament'i kurpa asina sende lampi di korozin anochi. Un kara di luna ta un kara di laba ku dos man. M'a dal mi kabes duru te mira strea. M'a rabia te mi wowo a bira skur. Un persona ku wowo kla no ta bou di influensha di bibida sterki. Si bo no paga lus na tempu, nan ta kort'e (deskomuniká e koriente). Den e kas tabatin un lus manera di bilorio. Si un fius bula, mester pone un otro na su lugá, pasobra drechamentu di fius kimá ku papel di plata di sigaria ta mashá peligroso. Lus di kumbu no ta ningun spiritu pero simplemente un klaridat debil di fosfor.