Un selekshon di palabra i ekspreshon. Deel 2

Deseo

Anhelá, deseá	Obedesidu, disididu
E ke bira dentista	Desishon, resolushon
Mara (mare) mi ta riku	Obligashon, obligatorio
Pidi, petishon, pidimentu	Eksigi, roga
Supliká, preferá	Demandá, permití, prohibí
Konseha, avisa	Forsa, dominá
Prefera, preferensha	Ta prohibí (tahá) pa pasa
Primintí, promesa	Boluntat, demanda i oferta

Deseo kumplí ta bida largu. Dos hende enamorá ta anhela di ta huntu konstantemente. Mi ke (ta deseá) e kos ei. Mi ke (ta kere) ku bo ta loko. Un mucha sa tin kièr. Un pididó di limosna ta kana na tur porta. Nos ta entrega un petishon na gobiernu. Despues di tantu pidimentu nos a kumpli ku su deseo. Priminti ta debe. Kumpli ku bo promesa.

[p. 9]

Bistí di primesa ta bistí di un santu ku un persona ta priminti di bisti durante siertu tempu, pa gradisi pa un fabor risibi.

Si bo ta domina varios idioma, ta un gran fasilidat. Den komersio tin e lei di demanda i oferta. E kos ei a sosode kontra mi boluntat. Un komandante ta duna su sòldanan òrdu. Sirbishi militar obligatorio. Esun ku sa di domina su mes ta realmente liber. Ambishon ta un deseo fuerte pa logra honor o éksito. Boluntat ta hopi, ma kaminda ta leu. No hasi nada forsá.

Tempu ku Wilson tabata presidente di Merka prohibishon a kuminsa. Tur mucha ta loko (deseá) pa vakansi grandi kuminsa, pa nan bai diberti i gosa poko, pero den e promé siman di vakansi kasi tur ta drumi te lat sin hasi nada. E kriatura a nase ku un gan'i kos den su frenta. Lo bo keda ku gana (deseo). Un mucha obedesidu no ta lanta mayó ku su grandinan. Pidi man di un dams, pa nan dunabu un stul (oportunidat di namora na kas). El a bin keha su mesté (nesesidat) seka nos.

Elisa tin ku puntra kaya p'e kana (ku kabes sushi i ku masha delikadesa). Ken? Kenken pi'e wesu! Kada hende ku kumpra briyèchi ta karga speransa di gana premio mayó. Ta den kabes bo tin e kos ei (ta un deseo ku no por logra). Awe mi kabes no ta pa muzik (mi no tin gana di tende muzik).

Tanten tin bida, tin speransa. No kenta Manchi su kabes ku un biaha pa Merka (no pon'e deseá ku lokura). Odulio ta manera katibu kastigá, shon rogá (e mester traha sin sosiegu). No tin mas siegu ku esun ku n' ke mira. Kurason kayente ta mata kaikai (sòpi purá ta sali sálu). Es ku Dios ke: kontesta riba ‘Duelmi muchu bo pièrde’. Si un dams ta sinta aña largu den bentana, anhelando su ‘prínsipe azul’ yega, mester bis'e ku e barku di su prínsipe no por nabega drenta te den su kaya i basha anker dilanti di su bentana.