Un selekshon di palabra i ekspreshon. Deel 2

[p. 5]

Tienda

Pakus, toko, karniseria	Lora algu den papel
Supermerkado, fruteria	Paketé merkansia
Doño di pakus, kliente	Paga na kaha
Bendedó, kumpradó	Floristeria, botika
Kosto i balor	Un bon surtido
Pisa den balansa	Aviso i propaganda den korant,
Trazjèt, tonbank	na radio i na televishon
Kana mira shokes	Papel di regalo
Baratiyo, algu pa ñapa	Un artíkulo kasi regalá
Likidashon, kompetensha	Libreria, muebleria
Artíkulo di segunda mano	Hasi habana

Awendia gradualmente supermerkadonan ta mata tiendanan chikitu. Pero intimidat, ambiente romántiko i e meskla di tantismo oló den kualke tienda chikitu nunka lo por ta iguala ni imita den e palasionan di komestibel i merkansia.

Tur hende ta gusta bider. Fruterianan a hasi bon nogoshi, pasobra nan por a keda abrí te lat.

Tin pakus ta duna rebaha ora bo kumpra hopi kos. Un floristeria ta un nogoshi ku hopi risku. Den botika nan ta bende remedi, pero tambe sensia (shete sorto) pa kita fuku di aña bieu i awa di sueltu. Kosto di un artíkulo ta loke ta su preis di faktura; loke e bal sa depende di e bendedó o e kumpradó.

Si un bendedó (empleado) den pakus puntrabu: ‘Nada mas?’ outomátikamente e ta pusha e kontésta ‘No’ den bo boka. Kumpramentu di bleki doblá o frusá den tienda ta mashá peligroso. Muebel di mahòk ta duradero. Tin komersiante ku kapasidat di bendebu porkeria lorá den papel di selofan, i tur esei ku un sonrisa simpátiko riba nan kara. Di un hende asina ei nos por bisa ku e ta honrado i sinsero manera un bendedó di outo di segunda mano.

Nogoshi ta nogoshi! Barata ta sali karu. Preis di galiña flaku o preis di famia, baratiyo i likidashon ta ekspreshon ku ta sirbi di ‘bakoba pa makaku’.

Den un karniseria por kumpra lomito, muchacho, karni mulá, bistek, higra, mondongo o un hapa di kabritu. Papel, pòtlot, pèn, envelòp i buki tin di bende den libreria. Un artíkulo por ta karu o kostoso (di hopi balor). Esun ku fia un artíkulo i bend'e bou di preis, djis pa haña plaka, ta hasi habana.

Anochi hopi hende sa kana keiru i mira shokes. Kompetensha di pakusnan ta na ventaha di pueblo kumpradó. Fábrikanan na Merka sa

[p. 6]

marka e artíkulonan ku sali menos bon: second, third, irregular. Esakinan e komersiante por bende mas barata. Un istoriador ulandes a yama Kaya Grandi di Otrobanda ‘De Poolse corridor’.

Promé ayá tur tienda tabata simplemente tienda. Djei nan a para bira toko. Algu paresido ta e pakus ku ta un boutique. Paga tinu ku kasi tur pakus tin nomber na spañó. Esei no ta únikamente un herensia dje tempu ku idioma spañó tabata manda na Korsou, pero awendia pa fasilita esnan di ábla spañó den nos besindario ku ta bin kumpra merkansia. Tin mashá hopi pakus kaminda e artíkulo di mas karu ta un sonrisa.