Tin hopi sosiedat anónimo na Korsow.
Ekonomistanan ta papia di dos sorto di artíkulo. Nan ta yama ‘artíkulo di konsumo’ loke nos por kome, bebe, huma, bisti; nan ta yama ‘artíkulo (instrumento) di produkshon’ loke ta mashin i aparato ku ta transformá materia prima manera katuna na produkto ku nos mester, manera kamisa i karson.
Ta mashá bunita si paga un obrero o un empleado un bon salario, pero e tambe mester perkurá pa e produsí algu, sin taha palu.
No por kumpra Yan, bende Yan. (Ora ta bende, mester hasi ganashi).
Hasi habana: Kumpra algu i bendé mas barata, djis pa haña plaka).
Tira un kuba: Tuma algu sin bolbe nunka mas pa paga.
Bon nogoshi ta: kumpra barata, bende karu.
Bende barata: 1. Bende realmente barata. 2. Mal sintá di muhé. (loke nan sa yama tambe ‘saka potrèt’).
Kosnan berdaderamente bon, manera airu fresku, no ta kosta nada, pero nan bal hopi.
Ora un komersiante ta horká ku sièrtu merkansia, e por bende na preis di kosto.
Leinan komersial ta fihá den Kòdigo komersial.
E mucha ta bendebu, kumprabu. (E ta papia ku fasilidat i ku boka dushi).
Ora bo ta bai kobra un chèk, bo tin ku firm'é parti patras.
Aki nos ta bende na preis di galiña flaku (na preis di famia): barata.
Tira un pará: Hasi un nogoshi riská, sin ku bo tin siguridat ku lo bo logra. (E ta nifiká tambe: Saka ventaha di un sitwashon ku a presentá) Den henter istoria di Korsow nos por lesa di tirament'i kontrabanda. Sa tin komersiante di mala higra ku ta ranka hende su sanger. (Kobra, gana di mas) Ta bende: Owto, tayer i piesa.
Márka industrial i derecho di owtor ta kana parew. Si bo uza nan sin permiso, nan ta demandabu.
Mañan ta fia!
Shon Fia a muri.
Auteursrechtelijk beschermd