Un selekshon di palabra i ekspreshon. Deel 1

[p. 37]

28 Religion

Tata grandi (Dios)	Diabel, satanas, demoño,
almasola.	Fe kristian.
Spiritu santu.	Biba den grasia di Dios.
Adorá Dios, venerá un santu	Sakrifisio di misa
Kantor di misa	Konbentu, parokia
Alma i kurpa	Krus, krusifiho, krusifikado
Beibel (biblia), evangelio	Shelu, fièrnu, purgatorio, limbo
Resa orashon, lesa buki	Pader, domi, rabi, pastor, obispu
Misa, kapèl, katedral	Predikashi riba prekstul
Sirbidó di misa	Papa, kardinal

Antes nan tabata ‘bati huda’ riba Saba di Aleluya.

Nos ta asistÍ na sakrifisio di misa o falta misa (keda sin bai).

Tin hende ta gusta ‘hui misa’ (drenta djis un ratu, p.e. despwes di predikashi o djis promé ku e parti prinsipal, i sali imdediatamente despwes di komunion).

Di ‘oir misa’ a bin resulta ‘oi misa’, i esaki a bira ‘hui misa’, ku un nifikashon diferente dje original ‘oir misa’.

Awendia tur hende tin nan opinion tokante selibato.

Nos ta ‘ofresé un misa’ na salú di un persona.

Boso a echa baina, pero ami a keda Kristu. (ami a karga konsekwensha).

No tin un Kristu Dios pa bisami ku no ta bèrdè. (no tin ningun hende ni nada....)

Elena ta biba masha na grasia ku su bisiñanan. (ku trato simpátiko i kariñoso).

Buchi Pe a kwe pia di krus tene mashá duru. (El a biba un bida di porko i awor e ta mas santu ku Papa, e ta resa pa bibu ku morto). Ta ki santu a baha den bo? (Ta kwa bon pensamentu a butabo aktwa bon?)

Chistosamente nan sa bisa ‘pasa un basora’ pa ‘konfesá’.

No hinka man den wowo di Dios. (No kik sin motibu).

Ta grasioso pa mira un hende sinta ‘pipitá rosarío’ myentras su wowonan ta kore rònt misa.

Tin hende ta dispwesto na hasi sakrifisio, pero nan ta lubidá tur e oportunidatnan chikitu pa trata ku kariño i komprenshon, loke por hasi bida bunita i agradabel.

Nan ta pretendé ku tin hasidó di brua ku sa ‘balia ku almasola’.

Un pader a yega di bisami ku no tin nada mas laf ku sinta konfesá un kantidat di hende den tempu di Kwaresma, pasobra piká no tin muchu variedat.

[p. 38]

Esun ku Dios no duna yu, diabel ta duna subrina. (Esun ku skapa di problema personal, ta hañé ku problema di otro hende).

Dios ta primi pero e no ta mata. (Dios por pone nos riba hilu, pero e no ta laga nos dal abow).

Sirbidó di misa ta hana kabit'i bela. (Esun ku yuda roza mondi, por piki palu pa traha kandela na su kas).

Ora m'a dal abow, m'a mira shelu pa un pampuna. (m'a keda zurí, zorokloko).

E mucha tin diabel su tras. (E ta inkliná konstantemente pa hasi malu). Diabel ta lòs! (Tene kwidow, pasobra tin peliger).

Fo'i tempu diabel tabata yònkuman. (Mashá hopi tempu pasá).

Djo libra; e kos ei no por sosodé. (Di ningun manera).

Dios librami di tres or'e malora. (Dios spar mi di desgrasia).

Loke Mani bisa ta evangelio. (Bo por kere libremente loke e bisa).

Awe ta fièrnu mes a sker. (Ta hasi un kalor teribel).

Prome ku mi gloria mi kurpa. (Mainta tempran, mardugá grandi).

Sende lampi i gloria kurpa ora ta bai kuminsá bira skur, ta un kustumber ku a bai fo'i moda.

Mara bo boka por ta santu. (Mara loke b'a bisa por resultá bèrdat).