Raspá

[p. 49]

Papa-Riki

Papa-Riki a hunga pjeda bai dam, laga Lamwèrtu keda ku ún dam so i e mes ku dos. No ku Lamwèrtu a baha kabes, sin kik pasobra Papa-Riki no kjèr a laga sali pa kaba. Al kontrarjo; el a bati Papa-Riki ku tur sorto di fèrkòwt i romatisma. Pero Papa-Riki a pasa ku su kara chícha den tur kentura ku fèrmidat, sin ku Lamwèrtu por a logra di bash'e abòw. Por sjèrtu ta pesej mes bisínjanan a kuminsá kere, ku Lamwèrtu a rekonosé ku el a pèrdè pelea i disidí na bòltu e blachi, kaminda tabatin marká e fecha di sentensja pa Papa-Riki baha pa sawaka. I di tal manera Papa-Riki a pasa nobenta baj trankil di dje, ku su lomba stret, su sintí parew i su wowo kla.

Mainta trempan Papa-Riki ta pará na porta di kurá pa e tira un bista riba tur e bunita galinjanan den kaja. I maske su boka sin djente ta bati manera kòkchi di prenda, e ta tira flor pa tur e kriánan, ku ta pasa bai marche di Punda. Un dia un nigrita manera un pensamentu a kontr'e ku: ‘Che, bo ta fresku manera piská. Un hòmbr biew manera bo mester bai drumi warda morto’. Pero Papa-Riki su lenga a pasa welek pa trimintí. I sin pèrdè pa gana el a bira kontestá e galinja: ‘Ta basora biew mes sa bari bon. I te na ora ku mi mester spera morto, anto mi ke sper'e den bo brasa gordo, shon mama’. Asina Papa-Riki tabata pasa su bijesa, ku su kurason bibitu manera un chabalitu di binti anja.

Pero un poko tempu pasá ej a parse ku porfin Lamwèrtu a kwe Rikichi un kabes abòw. Pasobra e biew a kuminsá sinti un doló stranjo na su pulmon i e kos ej a strob'e di kima un bon kalía. Morto spantá su junan a kore hib'e hospital. Ei den varjos dòktr a bin deklará, ku awor si Papa-Riki su fitòl a kaba,

[p. 50]

pasobra pa su fèrmidat no tabatin kuramentu posibl. Ju ku njetunan a prepará mortaha ku kaha i kèldu, pa duna don Enrique su entjero di primera. Ma despwes di un siman, ora famijanan a baj bishitá Papa-Riki, nan a hanj'e pará patras den balkon di hospital, humando un sigá di kwarenta sèn i kòmbrsando masha karinjoso ku un enfermera balente hopi bon danki.

‘Ta kiko esaki, Papa?’, su ju muhe majó a jega puntr'e, ‘m'a hasi Papa drumí na kama’. Rikichi a grita hari: ‘Ami na kama? Mira 'ki mi ju. Kama ta pa hende malu o mankaron i pa ora bo ranka un bon kanjá, bo sosega bo kurpa. Miho bosnan judami hinka mi korótonan den un sak'i papel, pa nos bai kas prome ku e kurjosonan aki den danja mi salú pa mi’.

Tur famija a kore buska dòktr den hospital, pa mira ta ki falta Papa-Riki. Pero despwes ku tres dòktr a listr'e, primi'e, tèst e rondó di su kurpa, nan a bin jega na e konklushon, ku Rèx ta fresku manera un salada. Su pulmon tabata funshoná perfektamente bon i ni un hende no por a komprondé di ki manera e bjehitu a kura asina bon. Su junan a hib'e kas atrobe, i tur mainta bo por a mira Papa-Riki pará atrobe den su porta di kurá, komo si fwera ta primesa el a hasi di tene warda na e luga ej i echa flor ku karinjo pa tur e dushi émbranan ku ta pasa den kaja.

Den esej riba un mainta e prome dòktr ku a trat'e a pasa kumind'e i puntr'e kon ta sigui ku su kurpa. Mesora Papa-Riki a hala na kòmbrsashon i gradisí e dòktr masha tantu pa su atenshon. Maske kada be ku un bon polèchi pasa kòrta saja, e tabata pidi e dòktr despensa pa e pis e bòngui-bòngui ku ta janga bai den kaja. Despwes ku e dòktr a jama ajo, Papa-Riki a bira bai paden, pa e konta Ma-Seferin, su kasá, ki sorto di hende simpatiko e dòktr ta. Ma-Seferin tambe a hanja ku ta un gesto masha bunita di pone asina tantu atenshon. I ora nan a kaba di gaba e dòktr di un punta na otro, Papa-Riki a baj

[p. 51]

sinta ku su kwarta bòw di palu den kurá, p'e bati poko wals di Kòrsòw i kontentá su kurason.

Pero ni dos siman drechi no a pasa, ku a bini un resibu di e mes un dòktr ku a para kòmbrsa na porta di kurá, menshonando un suma di bintisinku florin pa bishita i konsulta. Ma-Seferin por a skupi kandela pa tal sinbèrgwenseria. Pero Papa-Riki sí a keda mes kalmu manera sempr i e di ku su kasá: ‘Sefe mi amor, tende ki' bo pai ta bisabo. No laga mal ehèmpl dje ladron ej subi na bo kabes. Mi ta manda e muchanan bai paga e resibu i nos ta warda ku pasenshi. Pasobra hende di mala higra ta hanja nan kastigu. Mi wowo por ta djis un krenchi skur. Pero e dia mainta ku el a para papja ku mi na kurá, m'a liga su kara bon. I m'a ripará ku nèrvjo tin e peseta. Marka mi palabra. Aki poko dia nos ta tende kon el a dal abòw muri di ripjente. No tin kestjon. Hende ku no ta biba na pas ku otro no por tin kurason kontentu. Pesej nan ta muri prome ku nan ora’.

I dicho echo. No a pasa ni dos luna, ku e dòktr a hanja un speshi di ataka, para tembla, skuma na boka i dal abòw morto den su mes ofisina. Asina Papa-Riki a tende e notisja na radio, el a bisti su flus pretu, pega su dash'i pushi i baj morto dje dòktr na hospital. Hendenan ku tabata sintá na morto a mira kon Papa-Riki a kamna jega te na e kaha i papja un kos ku e morto, pero sin ku nan por a tende kiko el a bisa. Dj'ei Papa-Riki a pusha pechu manda pelanti i janga nèt riba su kurpa, sali bai.

Algun dia pasá ei m'a krusa den Papa-Riki su hanchi i m'a mir'e ta para kanta den su porta di kurá. Su kara tabata basta ploítu i ku su man e tabata tapa klaridat di solo pa su wowonan. Pero loke ta su lomba tabata stret manera un tabla. I ora un polechi a pasa su dilanti, el a job'e ku palabra dushi.

Kurjosidat a butami jega serka dje i puntr'e, ku porfin ta kiko el a papja e dia ku e kadavr di e dòktr. Papa-Riki a hari masha kanaja ku su boka plat sin djente i el a kontestami

[p. 52]

ku malisja den su stèm: ‘Ma si bru ke, bru tambe por bini mi fjesta. Pakiko no? Bru sa ku dia 17 di novèmbr mi ta hasi 99 anja? Ta pidi m'a bai pidi spiritu dje dòktr, ku si e por topa mi amigu Lamwèrtu, e bis'e pa mi, ku mi ta ward'e bin sigui e wega di dam i dal un par di betr pa nos pasa plèizi’.