Raspá

[p. 53]

Na mi ju majó

Den bo karera lo bo ripará, mi ju,
Ku mundu ta pimpá di loko,
Di abuzador ku ta papjabo di amor,
Ignorante ku ke pasa pa sabí,
Sinbèrgwensa ku ta prediká honor,
Fantochi di figura kara seku i ladron.

Ma si bo tata por dunabo un konseho:
Keda kalmu, sonreí i mantené trankilidat,
Ja ku istorja, bo maestro, lo probabo
Ku nan tur ta sukumbí den lodo.

Disfrutá di kos bunita, noble, elevá
I eduká bo mes, bo alma, bo sintí.
No eksitá pa gritunan di populacho
Muchu menos pèrdè tempu ku makaku.
Wanta bida ku pasenshi;
Uza tur bo komprenshon
I stima;
Stima tur, na un distansha.
Hasi bon ku sjeguedat di bisjo,
Rekordando ku Dios só ta duradero.
Otro kompanía, tur ta sin balor
I tristemente pasahero.

Riba 10 di juli 1961, e dia ku el a pone e prome paso serjo den su bida.