Mi lenga. Deel 1

[p. 71]

Di djesocho les

E strom den boka di haf no ta nada nobo. Hopi hende a pretendé ku ta pasobra nan a dèmpel e awa di Rif a bini e difikultat ku e strom ta buta bapornan pega den boka di haf.

Na aña 1634, ora ku van Walbeeck i le Grand a trata di drenta nos haf ku e barku De Brack, nan a mira un krus plantá den entrada di haf. Ora e barku a hala un tiki afo, pa bay lora i drenta haf, e strom a hala nan, bay pabow ku nan. Di dos be nan a bolbe purba drenta, binyendo di pabow, pero sin logra.

Despwes ku nan a lora pasa rondo di Kòrsow i purba di tres be, nan a logra drenta, riba 29 di juli 1634.

(Di ‘Antillano’ No. 6, mey 1954)

Moveshon den nos haf i Laman Karibe ku ta rondoná nos a yuda trese palabra i ekspreshon den nos lenga:

Lanta bela bay, pega barku, kabes di tera, boka di laman, kwe awa blow, kadena di ankra barku, barku ta hasi awa, baha na awa, hende tras di awa, fleyt byentu, bordo di baranka, bua kanoa, frek ponchi, kore den stef, kabes di boto, kore kósta, kore gil, (pasa den mal tempu), den mas brisa mas gòdèm, laman ganchu, laman chiki, máncha di piská, pasa den skwal, wowo di awa.

Boto, barku, barku di bela, bapor, bapor di zeta. Un barku ku tres master: brik, ku dos master: golèt, ku un master: balandra, kanoa (bua kanoa ku pagay), yola (boto chikitu plat), gigi: boto chikitu kologá tras di barku, kayuka (boto traha di tronkon di palu)

Hopi piská a haña un nòmber hulandes degenerá. Christiaan Zimmerman (un makamba) a establesé na Boka Sami. Probablemente ta pa su via hopi di e nòmbernan di piská a makambisá: Bèrsla, blas, brant, drikil, snuk, trompèt, fió, sekat, bonakanal, grastèlchi, jakupeper, masbangu, pepchi, sédi, aldu, anshòk, bèskòp, barbí, kongla, flerchi, garnachi, gepi, yaru, konofes, robèki, rònkòp, tinpòni.

[p. 72]

Piska fòndu, tira tray, hala reda, grap, slep, tira piská, trék masbangu.

Awa di playa (sòpi di piská fresku). Piskadónan tin un ‘pyeda píka’ ta pone den e sòpi na luga di promèntè.

Piská por shwata hende. (Venená). Hopi hende ta kere ku piská ku ta biba riba ‘banki di koper’ den laman ta shwata hende.

Bib'i (bibu di) awa:...... Masbangu fresku.

Laman hundu: kaminda tin piská di fòndu.

Laman afo (laman grandi, ganchu): hopi lew di kósta.

Awa seku: parti seka di kósta.

Laman ta yen. Laman ta seku.

Bindishonamentu di laman.

Riba 29 di juni, fyesta di San Pedro, patrono di piskadó, sa tin bindishonamentu di laman. Den presensya di tur piskado i nan famia pastor di Wespen ta bindishoná laman, pa nan haña hopi piská i pa masha poko desgrasya sosodé.

Loke un kaptan ninga, su matros sí ta gusta.

Gengu di: Pa librami di hende bibu, m'a bay drumi na lagun.

Ora djukfes ku kónofes ta papya, gutu mester hinka boka bow di lodo.

Esei ta as pa karpitan. (Ta kaba mesora).

Si bo kwe as tur dia, bo ta pèrdè tempu di piska. (Si konstantemente bo ta prepará, nunka bo ta kuminsa traha).

Hala garná, pa bay piska ku ne.

Tira garná pa kwe piská.

Fir i kobra liña.

Bay piska gengu. (Bay na mowla).

Bo parse un gepi sin mondongo. (Flaku, seku).

Sèt ola, sambuyá, tira kabes, bula saku di kòfi.

Ora tin byentu di Kwaresma (den luna di mart) esey ta byentu fwèrte, masha peligroso pa piskadonan bay laman.

[p. 73]

Kantika di bua kanoa ...... ...... ... ...

Bati'e bati mayo
solo na awa
anto bati mayo.
Mi wowo ta dwele di mir'e laman
anto mi brasa ta dwele di hal'e pagay.
Bati'e, bati mayo
solo na awa
bati mayo.
Mi brasa ta dwele di hal'e pagay,
mi atras ta dwele di sinta den kanoa.
Bati'e, bati mayo
solo na awa
bati mayo.
Klentin 'i Wespen ta mata matros
Merse 'i Lagun ta kria matros.
Bati'e, bati mayo
awa na awa
bati mayo.
kolekshon di Pr. Brenneker)
(Di ‘Lekete Minawa’,

Ehèrsisyo

1.	Pakiko no tabata kobra un hende pa ‘un kabes di boto’?
2.	Biba riba kustía di otro hende, ta: kore ...... .........
3.	Un bendedó di piská ta pasa den kaya, gritando: ‘Bib'i awa, Bib'i awa’. Ta ki sorto di piská esei ta?
4.	Un gepi sin mondongo ta: ..................
5.	Loke un kaptan ninga, ..................
6.	Un piskadó por ......... fòndu, ......... tray, ......... reda, ............ masbangu.
7.	Un ‘kadena di ankra barku’, no ta pa ankra ningun barku, pero e ta ........................

[p. 74]

8.	Un hende ku a pasa den mal tempu i hopi difikultat a kore ............
9.	Ora un hende kometé un eror, el a pega ..............
10.	Nos konosé tres parti di laman: 1. Laman ............. 2. Laman ............. 3. Awa .............