Mi lenga. Deel 1

[p. 75]

Di djesnwebe les

B'a krusa mi kaminda
i b'a spyèrta mi bida:

kunuku ta'ta soña den su hamaka,
nos a pisa tur su yerbanan sekreto,
tende swela ta keha bow 'i nos kurpa
i sinti solo ta dirti den nos man.

pero mi sunchi ta'ta kima mane' sumpiña
i bo rosa ta'ta soda su aurora.

B'a sigi bo kaminda
i un kadaver mi bida:

mi alma ta seka den sabana,
bo kara a bira un flor lubidá,
ma den mi wesu, meskos ku plasma,
bo esensha ta blo kristalisá.

(Di ‘Aurora’, Henry Habibe).

E Papyamentu di Aruba ta un tiki diferente for di esun di Korsow, den su entonashon i den un serye di palabra. Semper Indjannan a keda biba riba Aruba. Ademas di esei Aruba ta mas seka Kosta Firme ku Kòrsow. Di moda ku influensha for di e direkshon ei lo tabata mas fwèrte.

Lamper (welek), strena (bos), stichi (chincha,), rukuku (aladuru), pechu hel (barika hel), mokete (moketa), hoyo (buraku pa hunga ninichi), malesa (enfermedat), patrushi (kokoí, sokle), seida (flaira), manka misa (falta misa).

Tras di krus tin dyabel.

Krus ta bow (sin plaka ni kumínda).

Ta un krus ku un dònder (nunka mas).

Kwe pia di krus tene. (drecha bida, bira mas katoliko ku Papa).

[p. 76]

Krusa man ta yama morto. (Kerementu ku ora kwater hende topa i si nan duna otro man, krusando otro su man).

Kanadó no sa yora kaminda. (Ora bo ta move, traha, bo no mester kik).

Awor sí m'a yega kaminda mi ta bay. (Esaki sí ta kolmo).

Mal kaminda, kana lihe. (Si bo ta den un sitwashon laf, dal bay purá).

Kaminda bo ta mirami aki. (Manera bo ta mirami).

Flor di kaminda (pupu di kacho).

Nan ta na kaminda (nan ta yegando).

Awor bo tin kaminda di kana. (Awor bo tin motibu pa aktwa).

Un mucha spyèrtu (bibu, sabí).

Korda spyèrtami na tempu. (avisa) (lanta for di soño).

Soña lanta.

Drumi saka soño.

Pèrdè soño na kabes, busk'e na pia. (Despwes di a bira bashi, hasi grandi).

Morto na soño. Pega soño.

Soño ta ruman di morto.

Gay ta pisa (tret) galiña.

Pisa orgel (toka orgel).

Lenga pisá. (P.e. ora un hende ta fuma e no por papya bon).

Pisá di stoma. (Stoma no ta traha bon).

Kara pisá (antipatiko, mahos).

Mi ta bende bo yerba (Mi ta konta bo sekretu).

Mal yerba no sa muri.

Yerba shimaron (yerba di mondi).

Kura un hende ku yerba (sin remedi di dokter).

Swela ta mas abow! (Ora nan trapa un hende su pia).

Swela: Kweru pa halfusol sapatu.

Ora sumpiña hinka shon Grandi, e ta sak'e fo'i pia di sòldá.

[p. 77]

(Si algu pasa e grandi, e ta bah'e riba e chikitu).

Un hende ku mal sodó (sodó ku ta hole tristu).

Sodó bon ganá ta yora su doño. (Ta bisa esaki ora un hende pèrdè un kos di balor i bolbe hañ'e).

Tuma sodó (baño di sodó).

Soba (e baño di sodó ku un muhe ta tuma despwes di a duna lus).

Soba dje m'a bini: Bo mester ta kontentu ku m'a bini.

M'a traha mi kas ku sodó di mi frenta (ku hopi difikultat).

Muri hamber na sabana. (Hamber di grita).

Tira flor (palabra dushi).

El a muri den flor di su bida. (hoben).

Flor di su pechunan a kay. (Su pechunan ya no ta bunita mas).

E no ta hasi wesu byew. (E no ta keda muchu).

Un gengu floho te den su wesu (te den su higra).

Si kacho a nenga wesu, ta wesu mes e ta kome.

Wesu di lomba.

Nan a blo (aparesé) riba mi.

El a haña un blo (un luf, un chèns).

Ta blo (solamente) si bo mes hasi'e.

Blo sunu. Blo bashi. (Kompletamente).

Si bo haña pipita di kònkòmber na boka di mucha, ta hende grandi a pon'e. (E mucha a tende e grandi papya).

Danki di mundu ta pishi di yewa. (Mundu, hende ta malagradisidu).

Malu ta bini ku kabay, e ta bay ku buriku. (Enfèrmedat ta bini rapido, bay poko-poko).

Bos di buriku no sa yega shelu. (Palabra di hende bobo no ta hasi efekto).

[p. 78]

Ehèrsisyo

1.	E Papyamentu di Aruba ta un krenchi diferente for di esun di Korsow. Aya un lamper ta ........................, palu di kwihi ta ........................., chincha (pa tira pára) ta ......................... patrushi ta ........................ strena ta ........................
2.	El a hura un ................. ku un .................... ku e no ta bay nunka mas.
3.	‘Awor bo tin motibu pa aktwa’ ta meskos ku ‘Awor bo tin .................. di ...................
4.	Esnan ku ta kere ku nan por logra tur kos, sin hasi nada, ta: Soña .........................................
5.	‘Mi ta konta bo sekretu’ ta igwal na: Mi ta bende ..................................
6.	Malu ta bini ku kabay, e ta bay ku .............................
7.	Ora sumpiña hinka shon Grandi, e ta ...........................
8.	Un hende ku kara mahos o antipátiko, tin kara ...... ............................
9.	Nos no ta bisa ‘toka’ orgel, pero ....................... orgel.
10.	Bos di buriku no ...........................................