Mi lenga. Deel 1

[p. 51]

Di djestres les

Tida tambe a kibra brasa,
yu, ta poko kos ta'tin?
Ma yu, Djo deskansá Ma Tètè;
e ta den su mund'i bèrdè.
Su di-dia ta mi anochi;
t'e ta' kria Sarafina,
anto e ta' stim'e masha.
Bo sa ken sa send' un bela?

Djis despwe' i un par 'i luna
Fefe me a kana yega
mane' un karne 'i merino,
yora awa kwater-kwater,
pidi nan masha dispensa,
propon'e pa kas' unbe.

Den un frega 'i wowo asina
ya tur kos ta' prepará.
Anto bo sa ken ta' madrina?
Hosefina Pegapega,
anto Chan Barik'i lodo
ta' padrinu; nèt un par.

Shimi di breyt ta' masha nèchi,
di twil dòrná ku stench'i kwenta;
ku saya di satin ku kanchi;
krans ku wal dj'aki te unda,
ku su bukèt 'i tibaròs.
Ma e frenta sí ta' lombra
maner' un bol' i tutu di sebu.

(Fragmento di ‘Coma Catrin’, for di ‘Flor di Anglo’, Elis Juliana).

Koma Katrin ta dunando un bok'i redu, sintá seka Koma Trinchi, humando su sigaria kandela paden, saboryando kòfi ku súku dow.

[p. 52]

Elis Juliana ta e folklorista ku a deskribí figuranan di Kòrsow manera un ‘pintor ku palabra’.

Kibra piká. (Bay hasi un hende un bishíta despwes di hopi tempu).

Kibra yuna ku poko te.

Kibra un hende su kurason ku palabra dushi.

E ta den su mundu di bèrde...... (den bida etèrna).

Stima kos di mundu, ma no yanga ku ne. (No pega kurason na kos di mundu).

Nos a gosa un mundu (masha).

Asina bay mundu. (No laga e kos ei preokupabo, ta 'sina mundu ta).

No ta bo a traha mundu. (No kibra bo kabes).

Mundu ta rondo. Esun ku awe ta 'riba, ta 'bow mañan.

Tin mas dia ku tin siman. (Awe mi por sufri, pero kos por kambya).

Kada dia tin su nòmber. (No ta tur dia ta mesun kos).

Di-dia mester abri, pa anochi sera. (Tur kos mester tin un kuminsamentu).

Kiko dia ta bisa? (Ki notisya tin?).

Anochi no tin wowo, ma e tin orea. (Tene kwidow kiko bo ta papya anochi).

Tanten ku anochi no sera, kareda di biná no a kaba. (Myentras tin bida, tin speransa).

Anochi skur, demoño ta lur. (Hopi maldat ta sosodé den skuridat di anochi).

El a bini bela yen. (Bon purá).

Sende bela riba un hende su kabes. (Keryendo ku esei lo kausa su morto o enfermedat!?!?).

Lo mi sende bo bela. (Lo mi biba mas largu ku bo, pa mi sende bela na bo morto).

Ni ku bela di koló no por a hañ'e. (Kon ku a buska, no por a top'e ningun kaminda).

Belá bo ta? (Bruá bo ta?) (Esaki ta derivá di sende bela riba un hende su kabes, pa hasi'e chocho o malu).

Manera un kaṙné di merino (mansu).

Yora awa kwater-kwater (amargamente).

[p. 53]

Den un fregá di wowo. (Den poko tempu, den un drumi lanta, di un anochi pa di-dia).

No frega mi pasenshi (no molostyami).

Esta un fregantina!

Sirbi madrina (padrinu).

Karga kóla.

Stroisto. Yaya di stroisto.

Subi altá (Kasa).

Drecha bida. (Kasa despwes di a biba huntu).

Pa tur dams byew ku Elenita ta, Tjodo a bin saka su pia for di lodo. (Kasa ku ne).

Subi sòldu, bira lomba pa mundu, ronka na rabu.

Un hende ku dos dede di frenta (Ku sintí).

Mi por kana frenta ariba. (Pasobra mi no a hasi nada malu).

Frenta di tutu (manera un bola di tutu).

Di mi ta den mi frenta, anto di bo ta bow di bo brasa. (Nan sa ki malu ami a hasi; di bo ta skondí).

Hende ku ta soda na frenta, ta mal hende. (Un kerementu sokete!)

Sigá, sigaria, kalia, pipa, kachimba, sneyf, tabaku di foya, kabitu di sigaria, tabaku di kow (kowchi di tabaku).

Hari, grita hari, basha na harimentu, putri ku harimentu, hari barika yen, hari te lora bow, sonrei, sonrisa, un swenk di sonrisa.

Kara na papiyòt, frenta será, traha boka di trompèt, rèk lep, kinipi wowo, span wowo, traha kara di birg'i súku (inosente), habri kara (despwes di kara será), trose wowo malu, saka djente (hari), pone kara freposte, traha kara fis (pa mal olo).

Djente kibrá, dañá, putrí, tumbá.

Djente falsu, djente di konènchi, di kabay, di raton, djent'i maishi (grandi), djente chapi, djent'i kacho, plancha, boka batí, boka chumbá (kara chumbá), un djente di konofló, un lechi di konofló.

[p. 54]

Ehèrsisyo

1.	Ora bo bay bishitá un hende despwes di hopi tempu, bo por bisa ku bo ta bay kibra ..............................
2.	Di un hende ku a muri, nos ta bisa ku e ta den su mundu .......................................
3.	Un otro manera pa bisa ‘Ki notisya tin?’ ta: .......................................
4.	Yora amargamente ta ‘yora awa ...........................
5.	Kiko ta un ‘djente di konofló’? Por bisa tambe un le.................. di konofló.
6.	Un sinónimo pa ‘Den poko tempu’ ta: den un ......................................
7.	Si un hende su konsenshi ta limpi, e por kana .............................................
8.	El a kore yega ku masha fèrt, ta meskos ku ‘el a kore yega .............................................
9.	Tin subi altá (pa kasa), subi sòldu (pa bira byew). Kiko ta nifiká ‘subi bintiun tret’?
10.	Tantem ku anochi no sera, ka ............................... .............................