Palu di tamarein
Djis kantu di kaminda na Montaña tabatin un palu grandi di tamarein. Pero e palu di tamarein no tabata kontentu. E tabata yora mashá henter dia.
Den esei a pasa un enanu i tende kon e palu di tamarein ta yora.
‘Ai, mi amigu bon’, e palu di. ‘Mi ta mashá tristu. Pasobra henter dia outo ta pasa den e kaminda akí. Nan ta lanta hopi tera. Anto e tera ta susha tur mi blachinan. Mira kon sushi ki kurpa ta. Ma bo sa kiko ta pió? Muchanan ku pasa aki banda, ta tira kantidat di pieda den mi ramanan. Esei ta pa mi frutanan kai, pa nan por kome. E piedanan ta hasi mi kurpa hopi doló. Bo por yudami? Mare mi por biba te patras ayá den momdi. Ei lo mi por ta trankil’.
E enanu a para pensa un ratu. Tresten e palu di tamarein a keda mira e enanu. E tabata chikitu, ku man i pia chikitu. Su kabes tabata rondó i riba su kabes e tabatin un sombré di kabana pa tapa solo.
‘Mi ta kere ku ta posibel’, e enanu a kontestá despues di un ratu. Ma mi ta kere ku bo mester wanta ku poko pasenshi te tempu di awaseru. Si nos sakabu awor akí, bo ta kapas di seka. Pero den tempu di awa tera ta muhá. Anto nos ta hibabu te patras ayá, kaminda tin tera gordo i hopi awa’.
‘Bon anto’, e palu di. ‘Mi ta warda ku pasenshi.
Dos luna despues awaseru a kuminsa yobe.
Riba un bon dia un trupa grandi di enanu a sali for di mondi i yega seka e palu di tamarein. Tabatin mas di doshen. Tur tabatin píki ku skòp riba nan lomba.
Bon purá e enanunan a kuminsa koba tera rondó dje pal'i tamarein. Nan a soda, nan a koba, nan a traha henter dia. A la largu nan por a saka e pal'i tamarein fo'i suela. Pokopoko nan a bòltu e palu i nan tur a kargu'e riba lomba, hib'e te patras ayá den mondi.
Aya tras ya nan a koba un buraku grandi. Ku mashá kuidou nan a hinka e palu den e buraku nobo. Despues nan a tapa tera rondó di su raisnan.
‘Ta bon asina?’ un enanu a puntra e palu.
‘Mi ta mashá kontentu’, e palu a kontestá. ‘Masha danki pa boso yudansa’.
E enanunan a bolbe drenta mondi i e pal'i tamarein a keda para e so.
Ma despues di dos luna e pal'i tamarein a bolbe kuminsa yora i sklama.
Un enanu ku a pasa ei banda di kuné: ‘Ta kiko atrobe? Di kon bo ta yora tantu?’
‘Ai, mi amigu’, e palu di. ‘Aki tras ta mashá ketu. Muchu ketu. Mi no ta mira ningun hende pasa. Mi no por ku e silensio akí. Mi ta mashá solitario’.
Auteursrechtelijk beschermd
