Mangusá

[p. 36]

Johannes Petrus (Janchi) Boskaljon

Komo yu di Willem Boskaljon i Johanna Pieternella van Dommen a nase dia 17 di april 1863 Johannes Petrus Boskaljon.

Poko despues ku Janchi Boskaljon a drenta den sirbishi militar, el a disidi di dedika na muzik. Di su tio Frederik de Jongh el a haña su promé instrukshon di muzik (fluit).

Despues di a okup'e ku muzik durante basta tempu, nan tabata ke pa e skohe entre estudio di muzik i preparashon pa e rangonan militar mas haltu. Amor pa muzik a but'e skohe esun promé. El a keda militar, i 5 di April 1920 nan a nombr'e Adjudant-onderofficier.

Tur djadumingo anochi e tabata dirigi e banda militar den e kiosko di muzik ku antes tabatin dilanti kas di gobernador. Janchi Boskaljon a muri 5 di mart 1936.

Janchi Boskaljon a dirigi tambe e banda Sta. Cecilia. I na su entiero Banda Sta. Cecilia a toka e marcha fúnebre ‘Adios a St. Cecilia’ ku Janchi a komponé i ensayá ku nan.

[p. 37]

Na su honor a lanta e kiosko nobo na Plasa Brion, dilanti di St. Martinus Gesticht, dia 3 di januari 1937.

Eksigensia di tráfiko moderno a buta ku mester a kita e kiosko na juli 1961.

Di Janchi Boskaljon nos por bisa ku e tabatin un bida kompletamentede dediká na muzik.

Esaki tabata pegá na e kiosko nobo ku nan a inaugurá na Plasa Brion.

Kiosko di muzik dilanti di gobernador su palasio.

[p. 38]

Kiosko di muzik na Plasa Brion (Awasa di Otrobanda).

Den tur dos kiosko Janchi Boskaljon a yega di dirigi banda di muzik, esta tantu na Punda komo na Otrobanda.

Un detaye tristu mester agrega: Dak di e kiosko ku nan a lanta na 1936 riba Plasa Brion aktualmente ta lombrando wowo den mondi di Kurá Tabaku! Pero sikiera páranan di mondi ta forma koro i duna serenada den dje, komo un tributo konstante na e yu di tera Janchi Boskaljon ku a alegra tantu hende su bida ku muzik.

Anto m'a kere ku bo sa kon ta hala lechi.