Mangusá

[p. 32]

Lou i Kalitu

Lou lagadishi a kana topa kara-kara ku Kalitu kakalaka, den kaminda di Montaña. E kos ta ku tur dos a sinti e oló dushi di pida wòrs. Un mucha hòmber ku a pasa bai pariba, komiendo su pan ku wòrs, a laga pidi wòrs kai.

Mesora Kalitu a tira riba e wòrs, pero Lou a push'e un banda i grit'e: ‘Kakalaka mahos, t'ami a mir'e promé. Muf aki 'fo’.

Kalitu, sinembargo, ku su boka grandi, a hinka dos pia den e lagadishi su wowo i zundr'e: ‘Lastradó ku bo ta. Disparse lihé, sino mi ta huña bo kara p'abo’.

‘Esta fresku’, Lou a kontest'e. ‘Sóbadje bo n' tin ni kareda drechi den bo seis pianan. Floho bo ta. Kurpa due. Anto sinbergwensa’.

Kalitu a keda mira e lagadishi den su kara i puntr'e: ‘Lo bo ke kore pusta ku mi?’

‘Pusta ku bo? Esaki si ta grandi’.

‘Bisa si o nò. Bo ke kore pusta ku mi?’

‘Bon anto. Si bo ke, awor akí mes’.

‘Awor akí mesora mi n' por’, Kalitu di kuné. ‘Mi tin trabou di hasi na kas. Pero mañan mainta mi ta bin bisabu unda i ki ora nos ta kore’.

‘Mi ta wardabu n'e mes lugá akí’, e lagadishi a grita hari.

Kalitu a kana bai i laga e pidasitu wòrs pa e lagadishi. No pasobra e n' tabatin gana di kom'e, pero su formalidat a pon'e tolondra poko. E n'

[p. 33]

tabatin ningun sorto di trabou na kas. Ta gaña el a gaña e lagadishi, p'e haña un chèns di pensa kiko e tin ku hasi.

Ora Kalitu a yega kas, el a bai derechitu seka su wela i kont'e loke a pasa.

‘Ma mi yu’, e wela di, ‘kon bo ke bai kore pusta ku un lagadishi? E ta kore limpi bai lagabu’.

‘Pero m'a palabrá kuné kaba, welita’.

‘T'esei t'e problema’.

‘Ki' mi hasi antó?’

E wela a sinta pensa un ratu. Djei e di: ‘Mi sa un solushon. Tende bon. Bo ta bai bisa Lou ku otro mañan anochi och'or, ora tin luna kla, boso ta pusta kore’.

‘Pakiko anochi ku luna kla?’

‘Mi ta ripara ku ainda bo n' tin basta sintí. Lagadishi ta bestia ku sanger friu. Anochi, ora no tin kayente di solo, nan no por move. Ke men ku abo si ta kore pas'e trankil asina’.

‘Bon idea, welita, mashá bon idea. Mi ta bai bisa Lou’.

Despues ku Kalitu a bisa Lou ku nan lo kore pusta ku luna kla, Lou di kuné: ‘Bai bo bini aki un ora. Anto lo mi bisabu ku ta bon si o no’.

Bon purá Lou a bai seka su tawela i kont'e ku Kalitu a bis'e pa kore pusta ku luna kla.

‘E kakalaka ta mashá sabí’, su tawela a kontestá. ‘Bo sa pakiko el a propone e kareda ku luna kla? Pasobra nos ta bestia ku sanger friu. E ke men ku anochi sin solo bo no por kore. Anto e ta ganabu mahos’.

‘Kon mi ta hasi anto, papa?’

[p. 34]

‘Mashá fasil. Bo ta bisa Kalitu ku ta bon’.

‘Ta kiko esaki, papa? Papa ke pa mi perdè?’

‘Bo no ta perdè ni un ora so. Bo sa kiko nos ta hasi? Lagami splika mi yu. Nos ta pone un kandela chikitu na kada shen meter di distansha. Esei ta pa bo kenta bo kurpa despues di kada shen meter. Asina ei bo sanger ta keda kayente, di moda ku bo por sigui kore sin preokupa’.

‘Ei ta palu, papa. Bon idea. Nos ta hasi asina’.

Dos dia despues, fo'i banda di sink'or di atardi, un trupa di lagadishi, famia di Lou, a traha kandela riba e kaminda di Montaña. Na kada shen meter un kandela di palu seku ku nan a piki den mondi.

Luna a sali mashá bunita na shelu.

Och'or presis Kalitu ku Lou tabata pará kla pa ranka un kareda te misa di Montaña.

‘Bo ta kla pa sali?’ Lou a puntra yen di formalidat.

‘Ami ta kla’, Kalitu a kontestá.

Un kriki ku a para pa rèfri a duna señal i Lou ku Kalitu a kuminsa kore. Lou a pasa bai bela yen, laga Kalitu te patras ayá. Pober Kalitu tabata hupa den kaminda, pèrta pia ku tur energia den su kurpa.

Na e promé kandela Lou a para i kenta su kurpa. Di aleu ayá e por a mira kon Kalitu ta hala bin pariba. Komo e tabatin konfiansa den e kandelanan, Lou a sosega poko i kue rosea, te ora Kalitu tabata basta seka. Djei Lou a laga sali atrobe. Su pianan a lanta huma di tera, tapa Kalitu su kara, di moda ku kasi e n' por a mira unda e ta kore.

Kalitu a frega su wowonan, saka tera, bolbe sigui kore ku mes brio.

Na di dos, di tres i di kuater kandela Lou a bolbe sosega i kenta su kurpa trankil di dje. Den lorada di kaminda, te pabou ayá, e por a mira Kalitu ta totobiá, morto kansá. Lou a grita hari: ‘Chambon! Unda bo formalidat a keda? Kore! Lanta pia, kakalaka mahos!’

Kalitu por a yora di rábia, pero e no a perdè kurashi. Aunke el a kuminsa kompronde ku kasi sigur e ta perdè. El a ripara ku e kandelanan ta yuda Lou.

Despues di a kenta su kurpa bon, Lou a bolbe tuma den, pa e yega na e siguiente kandela. Pero ora el a yega shen meter mas leu, el a ripara ku e kandela a paga. Lou no tabata sa kiko a sosode. Logá un nubia chikí a pasa i sprengu poko awa riba tera. Esei a paga e kandela.

Lou, ku a yega basta kansá, a disidi di sigui bai te na e otro kandela, shen meter mas leu. Mientrastantu el a kuminsa sinti friu. Pasobra e bientu friu di anochi a fria su kurpa. Ma Lou a forsa, maske ya kaba su lenga tabata kologa te na suela. El a forsa p'e alkansa e otro kandela.

Ma kiko a pasa? E siguiente kandela tambe a paga. E mesun finfin di awaseru a paga e kandela ei tambe.

Morto kansá Lou a kai sinta. Tur su kurpa tabata kibrá i due. Su dedenan tabata friu. Su rabu tabata friu. Su kabes tabata friu. Ku su último

[p. 35]

esfuerso el a purba supla den shinishi dje kandela, pa mira ku e vlandam ke lanta atrobe, Nada. Blo shinishi friu a bula den su kara sigun el a supla.

Tristu di su alma Lou a kai drumi na suela. Friu a marié, te ku el a pega soño, sin por a muf mas.

Tresten Kalitu a sigui kore. El a pasa e promé kandela pagá. E di: ‘Hepa! E kos akí ta ole malu pa Lou. Ma ta unda Lou a keda?’

Ku mes brio Kalitu a bati bai pariba. Na e di dos kandela pagá el a mira Lou drumí pech'ariba banda dje shinishi.

‘O, Lou ei!’ el a grita e lagadishi. ‘Bo n' ta kore mas?’

Pero Lou tabata morto na soño.

‘Ta bon antó’, Kalitu di. ‘Mi si ta sigui’.

I asina ei Kalitu kakalaka a sigui kore den kaminda di Montaña. El a pasa e sobrá kandelanan ku e lagadishinan a prepara pa Lou. Pero ningun kaminda no tabatin ni sombra di Lou.

Ora Kalitu a yega final dje kareda, dilanti di misa di Montaña, el a haña su wela bieu ta para ward'e.

‘O, mi yu’, e wela di. ‘B'a yega porfin? Antó m'a pasa un sustu ora m'a mira kon e lagadishinan a pone un kareda di kandela pa Lou kenta su kurpa’.

‘Awaseru a paga dos kandela, welita’.

‘Djosolopaga’, e wela a sklama. ‘Awor bo por kana ku bo kara na laria. Nunka mas e lagadishinan no por yamabu un bestia sokete’.

Kalitu a kai sinta riba e trapi di misa, p'e sosega poko. E tabata kansá di su alma, pero kontentu i satisfecho.