Mangusá

[p. 28]

Brùg bieu i nobo

Nos promé brùg no tabata esun entre Punda ku Otrobanda, pero esun di Skalo, esta v.d. Brandhofbrug. Riba 7 di juli 1883 e brùg akí a uni de Ruyterplein i v.d. Brandhofstraat. Te ainda bo por mira e subida ku e tabatin antes na v.d. Brandhofstraat dilanti dje hotel ku tin ei.

E promé brug di Skalo, v.d. Brandhofbrug.

Nos di dos brùg ta esun entre Punda ku Otrobanda. Gobernador de Rouville ta esun di promé ku na 1868 a bini ku un plan pa uni Punda, Skalo i Otrobanda. Pero tabatin hopi krítika di Koloniale Raad, pasobra nan a kere ku un brùg ta stroba tráfiko di bapor i barku.

Nan a abri e brùg entre Punda ku Otrobanda pa públiko riba diamars 8 di mei 1888.

Brug entre Punda ku Otrobanda na 1892.

[p. 29]

Konsul merikanu L.B. Smith, a bini ku un plan nobo pa traha un brug di ponton entre Punda i Otrobanda. Esaki a sosode durante gobernashon di gobernador v.d. Brandhof.

Nos brug no tabata pornada. Hende na pia mester a paga dos sèn grandi pa pasa, pero si bo ta pia abou, bo por a pasa pornada. Despues, na 1910, outo mester a paga dies plaka. E kobradónan na brùg tabata para ku un paila chikí, pa fangu e dies plaka den dje.

Na 1939 a traha un brug nobo entre Punda ku Otrobanda. Esei tabata esun di Ir. Schoorl. Nan a kambia esun di 1939 su posishon varios be, pero te ainda ta e mesun nos tin.

Na 1888 nan a traha un brug di heru entre Molenplein i fòrti di Rif. Esei a keda eksisti te na 1931. Despues nan a bolbe traha un brug di betòn na e mesun kaminda, esta djis pariba di West End. Tur dos a disparse pa hasi tráfiko mas fasil. Riba e brug di Rif ei Piet Singer (tata) tabata sende fuego artifisial riba aña di Lareina.

E promé brug di Rif.

Pasa kontrami.

[p. 30]

Na 1906 nos a haña un brug smalitu entre Rifwaterstraat i Rif. Esaki ta esun ku pueblo a yama ‘Kòrta orea’. E otro brug dje mesun tipo, esta ‘Pasa kontrami’ tabata entre Sabasteeg i Rif. Esaki tabata trahá na 1910.

Laman di Rif manera e tabata antes, ku un dje brugnan smalitu (na e flecha).

E di dos brug di Skalo, trahá na 1928, manera e ta aktualmente.

[p. 31]

Brug nobo na laria entre Seru di Skalo i Seru di Otrobanda.

E di dos brug di Skalo a keda komo un adòrno, pasobra djis pariba di dje por krusa, esta for di marshe nobo pa Skalo. Ademas di adòrno e no tin mas utilidat, komo no a sobra muchu kos mas di nos Laman Chikí.

‘Den e prizon akí tin ladron. Mira kon nan a kibra tur trali di heru pa nan drenta’.