Mangusá

[p. 24]

Un pára straño

Tina totolika, e yu muhé di Toni ku Tansha totolika, tabata un mucha mashá kokèt. Enbes di kana buska kumínda den momdi, e tabata sinta peña su plumanan henter dia. Anto den e awa ku tin den e baki banda di pos e tabata mira su kara ki ora ku bo ke. Kada be e mes tabata bisa: ‘Esta bunita mi ta. Esta bunita mi ta’.

E lokura ei a buta Tina bira flaku, pasobra e tabata deskuidá su salú. Si no ta pasobra Tina ku Tansha tabata warda poko ko'i kome p'e, kasi Tina por a para muri di hamber.

Tansha di kuné: ‘Mi yu, ki dia bo kabes ta sera? Bo no por sigui asina’. Pero Tina a rosponde ku mal airu: ‘Mamai no ke pa mi ta bunita?’

‘Sigur mi ke, mi amor, pero mester kome tambe, pa bo no bira malu’.

Toni, su tata, a skual e hopi be, bisando: ‘Mucha ku tin kabes di pal'i maishi, lo mira kiko ta pasa kuné’.

Ni skual di su tata ni bon konseho di su mama no a buta Tina kambia. Tina a sigui hasi pantomina, keriendo su mes un beyesa sin igual.

Riba un bon dia Tina a bin realisa ku e ta presis meskos ku tur otro totolika: E mesun forma, e mesun koló di shinishi ku chukulati. E kos ei a buta Tina bira tur di malu. El a bolbe bai mira su kara den e baki di awa. Di ripiente Tina a kuminsa yora: ‘Mi ke ta bunita. Mi ke tin koló manera trupial, manera barika-hel o manera blenchi dòrnasol’. Tina a sinta yora awa kuater-kuater.

Den esei Tana, su ruman muhé mas grandi, a kana yega.

‘Ta kiko a pasabu?’ el a puntra Tina.

‘Mi ke bira bunita’, Tina a kontestá na yoramentu. ‘Mi ke haña un bunita koló. Hopi koló. Kon mi ta hasi, Tana?’

‘Bo sa kiko?’ Tana di, ‘mi ta yudabu. Pasobra ya m'a fada di tende bo yoramentu den mi kabes. Ban ku mi’.

Nan dos a lanta bula bai te na e kas di Pai Wili djis ei banda. Pai Wili tabatin un yu hòmber ku yama Luis. E Luis ei tabatin su kamber parti pabou dje kas. Semper su bentana di kamber tabata abrí, pa airu fresku drenta.

‘Bo ta mira e bentana ai?’ Tana di ku Tina, ‘esei ta Luis su kamber. M'a yega di mira ku Luis tin un doshi ku tur sorto di fèrf. Mashá hopi koló. Awor akí Luis ta na skol. Nos ta drenta su kamber. Anto mi ta fèrf bo kurpa na tur sorto di koló’.

‘Esta bon’, Tina a grita di kontentu. ‘Tana, bo ta fèrf mi kabes kòrá, mi alanan lila, mi lomba hel, mi pechu berdè. Anto mi pianan bo ta fèrf oraño’.

‘Manera bo ta desea’, Tana a sigur'e. ‘Ban drenta’.

E dos totolikanan a bula drenta i nan a sinta riba un mesa den e kamber

[p. 25]

di Luis. Mesora Tana e kwe e kuashi delegaritu, kuminsa fèrf Tina su kurpa. Di kontentu Tina tabata kanta sigun Tana tabata fèrf su kabes kòrá, su alanan lila, su lomba hel, su pechu berdè i su pianan oraño.

Ora Tana a kaba, e di ku Tina: ‘Awor bai mira bo kurpa den e spil ei na muraya’.

Bou di kantamentu Tina a bai para dilanti dje spil i gosa tur e kolónan na su kurpa.

‘Awor si mi ta bunita’, e di. ‘Tur pára den momdi lo ta yalus di mira ki beyesa mi ta’.

Sin yama Tana sikiera danki, Tina a bula bai den mondi. E paranan den mondi a keda mira asombrá. Nan no por a kompronde ta ki sorto di pára straño esei ta.

‘Lo ta un pára di fo'i tera’, un mòfi a bisa su kasá.

‘Pero ta di kon e tin tantu koló asina?’ un warawara a puntra nan. ‘Esta luangu el a keda. Sa tin pára ku tantisma koló strabagante?’

Tina, ku su kabes balente sushi, tabata bula di rama pa rama, yen di pikete, sigun el a tende kiko e otro paranan ta papia. E tabata loko di su kabes, makaku manera e so.

Ma den esei Tina a sinti kon su stoma a kuminsa gruña. El a sinti un hamber teribel. Mesora el a bula bai den kurá di Pai Wili, pasobra ei semper sa tin algu di tira na stoma.

[p. 26]

Tina no a ripara ku Luis a yega for di skol. Luis tabata sintá den su bentana di kamber, mirando den kurá.

Di ripiente Luis a mira un pára mashá straño baha den kurá, un pára ku mashá hopi koló.

Luis di: ‘Ta promé be ku mi ta mira un pára asina. Mi ta purba kue e pára ei den trampa. Anto mi ta but'e den e kouchi ku mi tin’.

Bon purá Luis a bai kue e trampa ku e tabatin wardá den mangasina di su tata. El a buta henter un tapushi di mainshi chikí i un bleki ku awa den e trampa. Anto el a arma e trampa meimei di kurá. Djei el a bai sinta spera den su kamber.

Tina ku tabata yen di hamber, a mira e tapushi den e trampa, huntu ku e bleki di awa. E no a perdè pa gana. Mesora el a bula bai na e trampa. Bon anshá el a kana rondó di e trampa, te ora el a haña e buraku pa drenta.

Tina a kore drenta i sisti su stoma ku mainshi i awa. Pero ora Tina a buska manera di sali, e no por a haña e buraku mas.

Tresten Luis a mira kon e pára straño a drenta su trampa. Bela yen Luis a kore sali den kurá, hisa e trampa, bai paden kuné.

Tina a basha na yoramentu. El a bati ala i bula manera razu den e trampa, te abri su boka na sanger sigun el a bati kontra dje waya.

Ma Luis no a preokupa ku esei. Mashá trankil el a hiba e trampa den su kamber. Ei el a saka Tina i but'e den un kouchi. Despues ku Luis a pone poko maishi ku awa den e kouchi, el a subi riba un stul i buta e kouchi riba su kashi di paña.

Sigun anochi tabata sera, Toni ku Tansha i Tana tabata spera Tina bin drumi den nan palu di indju.

Nochi a sera. Streanan a sali na shelu. Pero nada di Tina. Henter anochi e tata ku mama di Tina no por a sera wowo, di tristu ku nan tabata.

Mientrastantu Tina a yora te kansa, te pega soño den e kouchi di Luis.

Mardugá grandi Tana a sali pa buska su ruman. I sigun e ta bula, el a pensa unda asina Tina por ta. Di gòlpi a dal na su sintí ku kisas Luis lo por a kue Tina den trampa. Ai si. Kasi sigur. Luis lo a mira su ruman pa un pára straño.

Disididu Tana a dal un buelta banda dje kamber di Luis. E no a riska yega seka, pero e por a tende kla kon Tina ta yora.

Ku pasenshi Tana a keda warda te ora Luis a sali bai skol. Asina el a mira Luis sali fo'i porta di kurá, Tana a bula drenta e kamber bon purá.

‘Tana, yudami’, Tina a kuminsa grita, ‘sakami aki 'fo. Sakami lihé, Tana’.

‘Kalmu’, Tana di kuné. ‘Lagami mira kon e kouchi akí ta abri’.

Ku su pik Tana a kou e pidasitu liña ku tabata mara porta dje kouchi, i djis despues Tina por a sali.

‘Laga nos ban n'e baki di awa mesora’, Tana a bisa su ruman. ‘Bo mester laba tur e porkeria di fèrf fo'i bo kurpa, anto mesora. Asina bo bolbe

[p. 27]

haña bo koló di totolika, tur problema a kaba’.

Na e baki di awa banda di pos Tana a laba i kita tur e fèrf fo'i Tina su kurpa, te ku el a bin keda meskos ku tur otro totolika. Djei nan a bula bai seka nan tata ku nan mama.

‘B'a mira awor kiko ta lokura?’ e mama di. ‘Pára ku hasi ko'i makaku ... mira kiko ta pasa nan’.

Tina a priminti ku nunka mas e n' ta hasi pantomina.

I asina ei nan tur a keda biba den mondi, mashá felis.