Mangusá

[p. 21]

Dos kachó

Bagon ku Belin tabata dos kachó di kaya. Nan a nase den mondi di Kurá Spè i nan a lanta den bario di Mari Pampun. Bagon tabatin lana pretu. Belin tabata blanku, pero na su kabes, su rabu i su pianan e tabatin algun pida pretu.

Te pariba ayá den un kueba den mondi di Kurá Spè tabatin nan lugá di drumi anochi. Pero mainta trempan, asina gainan kuminsa kanta, Bagon ku Belin tabata lanta fo'i soño. Nan tabata kana bai pabou. Anto den e awa plat kant'i laman na Mari Pampun, nan tabata dal un baño. Djei nan sa kana den tur kaya di Mari Pampun, pa buska kuminda.

Tur hende den Mari Pampun tabata konose Bagon ku Belin. I tur hende tabata duna nan algu di kome. Pasobra nan tabata bestia mashá kariñoso. Pero Mario, un mucha hòmber ei banda, tabata stima nan mas ku tur. Semper Mario tabata warda su sobrá di kuminda pa Bagon ku Belin. Anto despues ku e kachónan kaba di yena barika, nan tabata hunga ku Mario. Nan tabata bula mashá kontentu i lembe Mario su man, pa munstra kon gradisidu nan ta.

Mario i hopi mucha di Mari Pampun tabatin kustumber di bai landa na laman, kaminda nan a traha e playa nobo.

Hopi be Bagon ku Belin a para riba e dam den laman, mira kon e muchanan ta diberti den awa. I varios be Bagon ku Belin tambe tabata drenta awa, pa gosa huntu ku e muchanan. Ta klaro ku nan dos tabata stima Mario mas ku e otro muchanan. Pesei nan tabatin kustumber di landa banda di Mario. Anto Mario tabata pasa man den nan kabes i papia ku nan.

Riba un djasabra mainta den vakansi Bagon ku Belin a perdè ariba. Nan a lanta mashá lat. Komo nan stoma tabata gruña di hamber, nan di: ‘Laga nos ban buska pida ko'i kome promé ku nos bai baña na laman’. I asina ei nan a kana pasa den e kayanan di Mari Pampun, pa sisti nan stoma. E dia ei nan no a mira Mario. Nan a kalkula ku Mario a bai landa. Asina a resulta tambe. Pasobra ora Bagon ku Belin a bai para riba e dam den laman, nan a mira Mario ta landa kaba. Bagon ku Belin a kuminda Mario: ‘Hou, hou, hou’.

Mario a bira kara den laman, i grita kumindá nan.

Bagon ku Belin a kai sinta un ratu riba e dam, pa nan sosega poko, komo nan tabata kansá di tantu kana.

Den esei Bagon ku Belin a tende un gritu. Mesora nan a bira pa buska ta ken, pasobra nan a rekonose e stèm di Mario. Kiko a pasa? Mario su pia a kue kram den awa. Esei a buta ku Mario no por a sigui landa.

E otro muchanan tabata basta leu den awa. Di moda ku nan no por a

[p. 22]

yega lihé banda di Mario pa yud'e. Bagon ku Belin a kompronde ku aki tin peliger. Si no yuda Mario lihé, e por hoga.

Bagon ku Belin no a para pensa, pero mesora nan dos a bula na awa, landa bon purá, bai seka Mario. Bagon a abri boka i tene Mario su man robes. Belin a pasa e otro banda, tene Mario su man drechi. Mario tabata pisá, pero e dos kachónan a lastra Mario, te nan a logra pon'e riba kantu dje dam.

Mario tabata morto kansá di sustu. El a pone man riba e dos kachónan su kabes i yama nan danki.

‘Boso a salba mi bida’, el a bisa e kachónan. ‘For di awe lo mi duna boso ainda mas kumínda tur dia’.

Bagon ku Belin a kontestá: ‘Hou, hou’.

Ma den esei e otro muchanan den awa a bai mira kiko a pasa ku Mario. Hopi hende pará na kantu tambe a kore bai mira.

Mario a konta nan kon e dos kachónan a salb'e. Tur e hendenan a para skucha i keda mashá kontentu.

Aki na Korsou notisia ta kore mashá lohé. Djis despues varios polis a yega Mari Pampun den nan outo. Un hòmber di korant a kore bin i el a saka potrèt di Mario ku e dos kachónan banda di dje.

[p. 23]

Su mes atardi e potrèt di Mario ku Bagon i Belin a sali den korant. Tur hende a lesa i gosa echo di e kachónan.

E dia ei Bagon ku Belin a keda na kas di Mario te banda di och'or di anochi. Nan a sinta banda di Mario den kurá, i nan a mira nan potret den korant. E tata di Mario a trese dos liber di karni pa Bagon ku Belin. E bestianan a kome te haña soño. Pesei e anochi ei Bagon ku Belin no a kana bai te na nan kueba den Kurá Spe. Nan a keda drumi den kushína di Mario su kas.

Te dia di awe, tur djasabra mainta, bo por mira Mario bai laman ku su dos amigunan Bagon i Belin.