Kwenta pa kaminda

[p. 21]

Neshi den pietermaai

Na anja 1832 e kas a basha den por kompletu. Pero sinku anja prome e mes kas biew ei den Pietermaai, kontra di laman, tabata un nèshi di amor.

Prome ku esaki no tabatin ningun hende ta biba den e kas. Tur su porta ku bentanan tabata kibrá, i tabata falta varios panchi riba su dak. E ultimo donjo, tempu ku e tabata na bida, a laga klaba poko tabla na e porta ku e bentananan, pa siertu respet.

Pero a la largu el a bin para bira ‘kas di spiritu’. Simplemente pasobra un dia nochi un bientu fwerte a bati un pida papel grandi den su sala. E zonidu a buta tur hende ei banda kere ku ta un spiritu a tuma poder di e kas bashi.

Pedro, sinembargo, tabata sa masha bon, ku no tin ningun sorto di spiritu ei den. Por sierto e tabatin kustumber di drumi sosega den e kas ei. Ora su barku jega anochi lat ku sálu for di Boneiru, e tabata pasa anochi ei den, pa su manise trempan e hala pa Montanja, kaminda su hendenan tabata biba.

Bintitres anja Pedro tabatin, un mulatu haltu ku kurpa ankrá. E tabata matros na bordo di e balandra ‘Stormvogel’, ku tabata karga sálu for di Boneiru. Cada be ku Pedro bolbe di Boneiru, e tabatin kustumber di kamna keiru den Punda ku Otrobanda, tirando un bista riba e nigritanan hoben ku tabata bini di Bandabau, pa sinta bende fruta ku berdura riba kaja. I den nan el a bin topa ku Sabelita, un nigrita katibu di diesnuebe anja di Bandabau. Nan a kuminsa kombersa, i Sabelita a bin gusta Pedro. Pero no tabatin kestion di kasa. Pa kuminsa no tabata permiti pa katibu kasa. Ademas Pedro no tabatin sufisiente plaka tampoko pa kumpra Sabelita i dun'e su libertad.

Kon ku bai bini, despwes di poko tempu Pedro a disidi di skonde su Sabelita den e kas biew den Pietermaai. Un dia atardi, ora Sabelita a kaba di bende fruta, el a tuma den pa hui ku Pedro, enbes di bolbe Bandabau.

Ora nochi a sera, el a kamna un distansha tras di Pedro, pa ningun hende no ripara ku nan tin algu ku otro. Asina nan a drenta Pietermaai, nan a sigui kamna kontra di laman, te ora nan a jega parti patras di e kas.

For di algun dia prome Pedro a buta algun stul, un mesa i un kama den e kas pa Sabelita. Pedro tabata kontentu di su alma ku porfin e por a forma un bibá ku e muhe ku tantu e ta stima.

Ora Pedro tabata na Corsou, e mes tabata bai kumpra kumínda i tur sobrá kos ku Sabelita mester. Pero ora e tabata sali pa Boneiru, e tabata laga un kriá di konfiansa kumpra tur kos pa Sabelita. Esaki tabata sosode anochi, ora ningun hende ta mira. I dje manera ei Pedro por a bai Boneiru trankil di dje.

Asina a bin pasa basta tempu, te ku riba un bon dia Sabelita tabata ensinta. E kos aki a preokupa Pedro masha. Pasobra si e mester a laga e ju nase den e kas ei, e joramentu di e kriatura lo por a buta tur hende ei

[p. 22]

banda hanja sa ku tin hende ta biba den e kas biew. Ademas e shon di Sabelita a laga partisipa tur kaminda, ku un katibu muhe di dje a hui bai.

Komo ta anochi so Sabelita por a sali for di e kas, pa kohe poko airu fresku, e tabata sinti su mes manera prezu. Di dia e tabata para konstantemente tras di jalusi, pa e weta sikiera algu di kaja.

Asina a bin sosode ku riba un dia tabatin poko mucha ta hunga ninichi dilanti di e kas. Sabelita ku tabata mira nan ku masha atenshon tras di jalusi, a gosa nan wega asina tantu, ku na un siertu momentu el a dal un gritu hari sin e sa. E muchanan a spanta, kore limpi bai, gritando: ‘Spiritu! Spiritu’.

Mesora nan a bai avisa polis. I poko tempu despwes dos polis a saka Sabelita for di e kas, bai ku ne. Maske kwantu Sabelita a grita i sklama, no a juda......

Ora el a jega kunuku, su shon a laga dun'e un bon sota di watapana den su lomba, i prohibi'e di bai bende kos na Punda. Na tur sorto di manera e shon a purba na saka for di su boka ta ken ta su amante Sabelita no a menshona Pedro su nomber ni un ora so.

Un par di dia despwes Pedro a bolbe for di Boneiru, i el a baha bon purá for di barku, pa bai serka su Sabelita den Pietermaai. Pero e kas tabata bashi. Riba e mesa tabatin un tajo ku poko kumínda biew i un bleki di awa.

Mesora Pedro a bai informa serka e kriá ta kiko por a pasa. Ora el a hanja sa ku nan a hiba su Sabelita kunuku, Pedro por a bira loko di tristesa. E tabata desespera, pasobra e no por a bishita Sabelita na Bandabau. Ma despwes ku el a sinta pensa un ratu, el a bin kompronde ku ta un manera so tin pa e bolbe hanja Sabelita.

Pedro a buska tur sorto di djap ora e baha for di barku, maske kon kansá su kurpa tabata. El a juda baha karga for di otro barku. El a bari kaja. El a limpia kurá di masha hopi hende. I asina el a sigui traha dos anja largu, hopi be te lat anochi, pa e gana plaka.

Despwes di dos anja e tabatin sufisiente plaka, ku e por a bai Bandabau, pa buska su Sabelita. El a kumpra Sabelita liber, i huntu ku Sabelita e mester a kumpra su propio ju homber ku tabata serka di kumpli dos anja. E mester a konforma ku e shon a buta su ju jama Juan, maske e mes tabatin deseo di jama su ju Antonio.

Kestion ku tin el a barka bai Boneiru ku Sabelita i su ju. Sigun nan ta bisa Pedro a bai biba banda di Antriol, i ku el a sigui traha riba Boneiru, sin bolbe Corsou nunka mas.