m'a tende de bes en kwando un zonidu stranjo mi tras. Pero m'a kalkula ku e oso mi tras lo a ronka algun respu.
Na e borchi dilanti di Stuyvesant College m'a baha, krusa kaja, i sigui kamna den direkshon di Rustoord.
‘Hei. Meneer!’ m'a tende un hende grita mi tras. ‘Tende un kos aki’.
E stem no a zona muchu simpatiko. M'a drei i mira ku e olefante di den konvoi tabata kore bon kansá mi tras.
‘Mi por juda mi shon ku algu?’ m'a puntr'e. El a para gatia poko rosea mi dilanti, pusha un dede manera un wors den mi stoma i grita: ‘Ta bo ta skirbi tur e artikulonan chombon den korant?’
Mi di: ‘Bueno, chombon mi no por kore bisa. Pero mi ta diberti mi mes’.
‘Ta diberti bo ta jama e kos ei? Sinbergwensa ku bo ta. Bo ta kere ku bo por diberti bo mes, ora bo ta hasi mofa di otro hende?’
‘Dispensami. Mi no ta kompronde ki mener ke men’.
‘Dia ku bo a skirbi riba Elizeo ku e ju di afo. Lo bo ke bisami ku no ta mi bo kier a men?’
‘Ai, mi shon. Esei ta kos ku ta sosode masha aki na Corsou. Meskos mi por a duna e tipo un otro nomber. Por ehemplo Zebedeo......o Calitu. M'a skirbi Elizeo, pasobra ta esei ta e prome nomber ku a dal na mi sintí’.
‘Bo ta ganja’, el a kuminsa grita. ‘Bo konose tur hende den Corsou. I bo ta gosa di por ridikulisa nan’.
‘Tende un kos aki, mener’, m'a kuminsa splik'e. ‘Ora mi ta skirbi, mi ta laga mi fantasia traha. Nada mas. Puru fantasia’.
‘Bo ta un abuzador’, el a zundrami. Su kara a bira asina kòrá, ku m'a kere ku un momentu pa otro e ta hanja un ataka i kai morto mi dilanti.
‘Mi ta bisabo for di awor aki’, el a sigui fulminá, mientras e tabata menasami ku su dede. ‘Si bo hera skirbi ku mi ruman muhe a hanja ju ku un soldá Merikanu den temp'i guera, mi ta kehabo. B'a kompronde?’
Ami a sonrei, pasobra ja m'a hole un historia nobo pa mi skirbi. Pero parce ku mi kalma a buta e homber bira mas razu.
‘Mi ta laga nan serabo’, el a bati bai ku furia, ‘si bo publika ta ju di ken mi ta, i si bo skirbi ta di ki manera m'a bini na mi kas’. Su wowonan tabata serka di bula afo, i e tabata blo pua pa hala rosea. ‘Tene kwidow bo skirbi ku mi ta bende number o hasi brúa’.
‘Laga nos kompronde otro bon, mener’, m'a purba kalm'e. ‘Si mener sigui kunsumi asina ei, anto ta pasa mener loke sa pasa ku donderbos’.
E barigon a paralisá. Su boka a keda tembla sin por saka palabra.
‘Bueno, mi shon’, mi di ku ne. ‘Mener a kontami poko kos masha interesante. Pero mi tin ku sigui. Tin un amigu ta sperami’.
‘Sigur ta bo famia ta sperabo den Montekristu’, el a benta mi tras ‘Pakiko bo no ta skirbi riba nan?’
A dwel mi ku mi no por a kumpli ku e homber su deseo. Ta pader Brenneker tabata sperami, pa nos charla di tur diadumingu mainta. Pesei m'a pone e barigon mes riba e papel aki.
Auteursrechtelijk beschermd
