Kwenta pa kaminda

Barbulete pretu

‘Porfin bo ta sali awe nochi?’ Minta a puntra Garichi su kasá, ora el a mira ku Garichi ta sinta limpia un pistol.

‘No tin moda di hasi’, Garichi a kontest'e, i el a kuminsa hinka e balanan den e pistol. ‘Ja nos a saka e sinkwenta karton di sigaria kaba riba

[p. 23]

papel model B. Nan ta na bordo. Awe nochi diesun or nos ta sali pa Jacmel’. Garichi a dal un gritu hari ora el a menshona e nomber di Jacmel, sabiendo ku ta imposibel pa bai Haiti i bolbe Corsou rapidamente. ‘Ton ku Kai ta sali poko mas trempan ku truck, pa nan bai warda nos na Koraal Specht. Ei nos ta baha e sigarianan na tera. Si tur kos bai bon, nos ta bolbe kas banda di kwat'or di marduga’.

‘Pero b'a lubida riba e barbulete?’ Minta a observa, i el a munstra Garichi e barbulete pretu i grandi riba muraja di sala. ‘Bo n' sa kiko un barbulete asina ta nifika den kas? Kwalke famia di nos ta muri. Por ta tambe ku kwalke kos masha malu ta pasa nos’.

Garichi a drei wak e barbulete. E no kier a kere den ko'i loko. Sinembargo na mes momentu el a sinti kon el a kuminsa bira un krenchi nervioso. El a dominá su mes, grunja algu i sigui pusha e balanan den su pistol. E tabata sa ku e no por a pospone e biaha di awe nochi, pasobra sinkwenta karton di sigaria lo duna basta ganashi, pa e por sosega por lo menos dos luna.

Henter dia Garichi a purba hasi homber, pero el a sinti kla kon miedu a but'e bira nervioso. Diferente be el a sinti gana di dal e barbulete mata ku sapatu, pero e no tabatin kurashi.

Ora Simon a bin busk'e banda di dies or di anochi, su rudianan tabata tembla un poko. Aunke el a papia ku masha formalidad, pa Simon no nota su ansha.

‘Awe nochi nos tin bon tempu’, Simon a bis'e. Garichi a grunja ‘Uhun’ i para wak kon lusnan di Simon su auto tabata buta e gotanan di awaseru lombra riba kaja.

‘Te aworo, ma’, el a grita su kasá i drenta auto.

Simon a start e auto, i nan a kuminsa pasa den kajanan, pa nan bai waf.

‘Bo ta ketu awe nochi’, Simon di ku ne, despwes ku nan a kore komo sinku minut sin ku Garichi a papia un pia di palabra. ‘Ta miedu bo tin ku nan por kwe nos?’

‘Mi n' sa, Mon. Henter dia tabatin un barbulete pretu den nos sala di kas’.

‘Laga di ta kere den web'i gai’, Simon a grita hari. ‘Ta chocho b'a bira? Mira aki, bru, ku e awaseru duru ku ta kai aki, ningun selador no ta bai para molostia nan kurpa riba kósta pa kontrola ningun kontrabanda’.

‘Pero Minta mi kasá ta masha preokupa’.

‘Ta kiko esaki, Ga? Ta mará na saja bo ta? Pone bo sintí parew, palu. Pasobra mi ta kere ku na bo kas ta bo tin ku manda i no bo kasá’.

‘Ma bo mester kompronde ku nos ta resien kasá. Ainda Minta no a kustumbra ku e kosnan aki’.

‘Mi no tin un bledo di kompronde’, Simon a kuminsa bira bestia. ‘E muhe fini delikadu ei di bo ta kapas di stroba tur kos’.

Garichi a sinti kon rabia a subi na su kabes, pasobra el a sinti su mes ofendi. Den un momentu di sieguedad el a saka su pistol i pon'e riba Simon su pechu.

[p. 24]

‘Desgrasiadu’, el a grita. ‘B'a ofende mi senjora’. Simon su kurason a dal sera ora el a mira e pistol. Pero mesora el a reakshona. Ku tur su forsa el a trapa brek. E motor a paga i e auto a para di golpi. Garichi a sali bai dal ku su kabes den winshil i e pistol a kai for di su man. For di su konosementu i tur trosé di banda el a keda drumí riba kusinchi dje auto.

Simon a dal un rosea di alivio i skucha si Garichi ta na bida ainda. Asina el a mira ku Garichi su pechu ta subi baha, el a trankilisa. Mientrastantu awaseru a sigui bati riba dak di e auto.

‘T'esei ta pasabo ora bo bai tira kontrabanda ku homber kasá’, Simon a kuminsa kik. ‘Awor mi tin ku hiba e homber aki kas. I mi no por sali ku barku tampoko. Lo ta te manjan atrobe. E kosnan aki ta pomperu’.

Tur desapuntá el a start auto i bolbe kore bai pariba. Asina el a jega dilanti di porta, e senjora di Garichi a bin kontr'e i puntr'e ta kiko a pasa. Ma Simon a bis'e keda ketu i habri porta lihe.

Ku awa na wowo Minta a habri porta di kas i laga Simon pone su kasá riba sofa den sala.

‘Ta morto mi kasá ta?’ el a puntra Simon tur nervioso.

‘E ta bon-bon’, Simon a kalm'e. ‘Ta djis el a dal su kabes kontra di glas dilanti di auto. Aki ratu ora e ta na su tinu atrobe, bo por bis'e ku mi tin e pistol warda p'e. Te aworo’.

Banda di seis or di mainta, ora un selador a bin kambia esun na wardá riba waf, e di: ‘O, ta masha stranjo. Parse ku nos amigunan no a sali pa Jacmel ajera nochi. E barku ta mará na waf te ainda. Ta kiko por a pasa nan? Anto mare nan sa ku henter anochi tabatin selador manera chincha tur kaminda riba kósta, pa changa nan ku nan sigaria’.