Kantika pa Bjentu

[p. 5]

Di tur esnan ku den kaminda grandi

Di tur esnan ku den kaminda grandi
a topami, disparsé despwes di poko tempu,
no tin márka di sanbarku mas den tera,
ni oló di nan sodó pa rekordá.
Tur echadó di kwenta pa kaminda,
unda nan spiritu ta?
Pakiko tur a bira lomba, skupi, subi trapi,
pa mi só, manera ju sin mama,
keda bati boka den tranké di datu?

Esta un piká, ku magasina jen
ta pidi man pa dakuná bagás,
i tantu manga di pilón lombrá
ta drumi ketu, orja trahadó.

Mi ke, mi ke.
Mi boluntat ta grandi,
ma mi so n' por bencha túsa den tutúmba,
p'e kosecha di sehú
por bira un monton di garnafèjn.