Kantika pa Bjentu

[p. 1]

Rib'e dia ku mi logra

Rib'e dia ku mi logra
mi poema di sublime perfekshon,
enserando sintimentu di mas noble
ku mi por a konsebí,
lo mi ta mane' katibu,
ku, lantá fo'i paniweri,
ku su kurpa na herida,
ma su kar' alsá na shelu,
ta jorando di kontentu
ku su pena ta pagá.
Orgujoso lo mi para kontr'i awa,
ripitj'ele,
pa makwakunan por balja riba bjentu
mjentras mi ta resitá.
Lo mi pasa den tur mondi,
pidi páranan skuchami.
Lo mi kamna riba kaja sin ripára,
ripitj'ele, pa tur hende,
pa su ritmo i su kanto penetrá den kurason
di tur esnan ku ta tendemi.
Rib'e dia ku mi tin kristalisá
e kantidat di pensamentu
ku m'a stiwa den mi pechu
den akordenan riská,
lo mi plama su zonidu riba nubja,
implorando firmamento den anochi,
k'e por chorja den serena
mi delirjo su fulgor.

[p. 2]

 

I barankanan lo spanta, sagudí,

 

sigun mi gritu gogorá te den nan tripa.

 

Ai, mi Musa, ta di kon bo n' ta lagami

 

ranka furu di mi alma

 

den poema di mas puru ku tin mi martirisá.

 

Esta teribl ta mi ansha,

 

ki kruel ta mi anhelo,

 

si mi tin ku sigui sufri,

 

enfokando riba tema imposibl pa palabra ekspresá.

 

Ma un dia mi ta lanta,

 

rementá fo'i mi kadena,

 

i n' entrada di prizòn

 

lo tin trianu ku guitara,

 

benta, kachu ku barí

 

pa habri porta di mi kanto.

 

Lo tin koro di nigrita

 

pa judami desbordá mi alegria,

 

i kargando riba seru di nan pechu

 

nan lo hiba melodia

 

dje kansjon ku mi sintí a pursigui.