Arte di palabra

11. Lírika didáktiko

Lírika ku karakter instruktivo nos ta yama lírika didáktiko.

Esaki por ta:

1. epigrama

2. sátira i parodia.

Un epigrama ta un poema kortiku i ku sentido. Nan sa kontene wega di palabra. Hopi be nan sa kritiká kwalke sitwashon malu den komunidad, eror di un persona o un falta general di publiko. Esaki ta nifika ku nos por klasifika un bon teksto di un ‘banderita’ bow di lírika didáktiko:

Den santana tin spiritu.
Hende bibu ta malditu.

Si bo ta biba di redashi,
ta paso' b'a saka nos selashi
bai bent'e tur riba kaya.
Ma bo dia t'ei, kanaya.

Un bon ehempel di lírika didáktiko ta ‘Lisinbein’ di Enrique Goilo.

Sátira

Un poema satíriko ta ekspresa mofa, indignashon o odio. E dos ekstremonan ta ironia (un pilmentu leve) i sarkasmo (indignashon fwerte). Un sátira ta señala un eror, un sitwashon malu o un inhustisia.

Lagadishi, bo n' por stop di lastra
riba bo barika pidi tera
pa bo kamna i baj dilanti?

Bo n' por wejta pa e kárga inutil

[p. 15]

 

di bo rabu bira ala

 

pa bo lanta for di swela?

 

 

 

Ta tur sempr lo bo keda

 

janga bobo riba tera

 

i kome bonchi ku bo n' planta?

 

 

 

Mi tin dwele di mirabo

 

aspira un luga den solo

 

ku bo kara 'i sinbergwensa...

 

 

 

Ma, t' inutil, ja mi sa:

 

maske ki mi pensa, ki mi papja,

 

lagadishi ta un bestja lastradó!

Konosiendo Luis Daal, nos por kompronde pakiko el a skibi e sátira aki riba un politiko sinbergwensa.

Parodia

Ora un poesia ta un imitashon chistoso di un otro poema serio, pero manteniendo e mesun fórma di e poema original, nos ta yama esei un parodia. E kontenido, naturalmente, ta na un nivel muchu mas abow ku esun original.

Hopi tempu pasá m'a yega di tende un parodia riba ‘Atardi’ di Corsen:

Ta pakiko, mi no sa
ma bon hodidu mi ta bira
tur atardi ku mi mira
bo figura bon ankrá.

Talbes ta un remordementu
o ta mi guayabo kisas
podise n' ta nada mas
ku un bon kishikimentu.