Arte di palabra

12. Poesia líriko-épiko

Ta imposibel klasifika épika i lírika den dos grupo determina. Tin tantu poesia ku ta líriko i épiko na mes momentu. Nan ta épiko pasobra nan ta relata un istoria na un manera obhetivo; i nan ta líriko pasobra e poeta ta trata na ekspresa su sintimentu.

Romanse i balada ta pertenese na lírika-épiko. Por sierto poetanan mes sa usa tur dos nomber pa e mesun idea.

Tantu romanse komo balada ta kontene un istoria kondensá, ku generalmente tin un final inesperá i tristu.

[p. 16]

Romanse ta nifika: un kantika den idioma romántiko; esaki ta idioma popular, ‘lingua romana’. Esaki ta net kontrario di ‘lingua Latina’, idioma di sabionan.

Balada ta deriva di un verbo italianu ku ta nifika ‘balia’. Ke men ku originalmente e tabata nifika un kantika pa balia.