Arte di palabra

9. Kansion, himno, oda

Un kansion ta partí den kwalke kantidad di estrofa o kuplet. E kantidad di verso di e estrofanan por varia. Originalmente un kansion tabata skibí den un idioma simpel. Tin kansion popular te kansion (kantika) di misa.

Un kantika di misa masha konosi ta: Mama di bon conseho.

Mama jen di toer clemencia
Nos ta yega cerca Bo
Pa bo sinja nos prudencia
Den e mundu ganjadó.

Ata nos cerca bo
Sinja nos ley di Dios
Pa bo sinja nos prudencia
Nos ta yega cerca Bo.

Esaki ta un di e tantu kantikanan ku Shon Wein Hoyer huntu ku pader Poeisz a komponé mas o menos sesenta aña pasá, den e edifisio ku aktwalmente ta Radio Hoyer na Julianaplein. Nan a kompone tantu teksto komo muzik.

Si un kansion ta skibí na idioma elevá, i si e poeta tin entusiasmo pa grandesa di su tema, nos ta yam'e un oda o un himno.

Un himno ta un kansion religioso ku ta kanta di Kreador o tema divino. Un oda ta un himno di alabansa ku por trata di kwalke otro tema elevá (sea kos o persona).