Arte di palabra

5. Lírika di amor

Den esaki un poeta ta kanta tokante amistad i amor. Amor sa ta masha profundo i e ta buta ku esun persona no por eksisti sin e otro. Ta klaro ku amor pa tata i mama ta diferente for di amor entre homber i muhé.

Tratando pues di amor, un persona ta metí den su totalidad, for di su eksistensha espiritwal te na su inklinashon natural.

Den literatura nos sa topa tambe ku amor platóniko. Esaki ta e amor ku un owtor ta sinti pa un imagen ideal. Tambe e sa ta amor sin pensamentu riba kurpa.

Nos por papia di lirika popular i lírika kultural.

Lírika popular ta ora un individuo ekspresa den un poesia loke basta tempu kaba henter un pueblo ta sinti, pensa i desea.

[p. 5]

Lírika kultural (artístiko) ta ora e individuo ekspresa den un poesia loke ta su sintimentu personal (individual).

Un ehempel di lírika popular ta e kantika di píki ‘Di ki manera’:

Di ki manera, eh
di ki manera nos ta biba na mundu
ku pekadó di mundu
tur ta desolá 'i nos.
Di ki manera, eh
di ki manera nos ta biba na mundu
ku pekadó di mundu
tur ta traishoná nos.
Di ki manera, eh
di ki manera nos ta biba na mundu,
ku pekadó di mundu
tur ta lanta kontra nos.

Un ehempel di lírika kultural:

Ni laman di nan grandesa
ni orkan di nan mintira
no por paga
bo chispa
afro-latino
ku ta kima
den pos di mi alma.

Nan ta trapa bo kurpa sendí
lastr'e den lod'e barbarismo
ma den kweb'e mi sintí
un tambú
ta kanta bo ritmo
- pa Congo balia barí -
i den riw di mi sanger
bo ta baña mane'
un spiritu
gwaraní.

(H. Habibe)

Kuminsando na Italia, i despwes na otro pais tambe, poetanan tabatin preferensha pa soneto, ora nan ta kanta nan amor platóniko, pwes e amor ku nan ta mira komo algu ideal.

[p. 6]

Adorashon di hende muhé a bin para bira un homenahe religiose, un kulto di loke ta eternamente bunita, e bunitesa ku a bira símbolo di tur loke ta noble i bon. l e muhé adora a bin bira un símbolo di sabiduria, siensia, di beyesa. Un ehempel ta Dante ku su Beatris.

Un ehempel di soneto ta:

Den kaja ketu, tur anochi, bo ta kejru ku mi...
Segun mi kamna skucha, mi t'añabo band'i mi.
Bo stem ta bjent'i ost, su karisja ta bo man,
i bo kabej abrí ta fini-fini 'i streanan.

Den mi orea tin un zonidu ku ta mata kaja ketu
i esej ta batimentu di bo hilchi altu
ku ta kompañá ku su muzik nos kamnamentu:
muzik ta ekspresa tur loke un kurason ta sinti.

Un ola di Amor ekilibrá, jen 'i bida nobo,
mes hundu ku laman di boka o di un bahia grandi
ta kore awó den kajanan, mej-mej di anochi,

mjentras ku, emoshona i muda, sin por papja
- maske mi sa ku bo ta mijanan fo'i djaki -
lo ami sigui dwalu ku bo den kajanan na soño.

Di Luis Daal (na su ortografia original)

Si den lírika di fe sa tin tambe e poesia líriko di inkredulidad o avershon pa Dios, anto den lírika di amor tambe nos por pone e lírika ku ta ekspresa odio i antipatia.

Den e fragmento sigiente di F. Oduber su ‘Kana konta’ nos tin un ehempel:

Hesu
ku mi ta despresia
esnan ku ta kana konta

ku bida ta un enkargo di dios,
ku amor ta solamente un wega...

Lírika nashonal tin su ekspreshon den un himno nashonal. Esaki ta e kansion ku ta ekspresa pensamentu di unidad nashonal. E ‘himno’ ku gobiernu a pusha den nos boka di stoma, no tin elemento di uni-

[p. 7]

dad. Pesei e no por bira un himno berdadero.

Esun biew (‘Den tur nashon nos patria’) tabata ekspresa unidad den su tempu. Despwes lsaac Mauricio a kambia su teksto pa trata na ekspresa unidad.

Si un poeta no ekspresa sintimentu di un pueblo - loke ta karakterístika prinsipal di lírika popular - anto e ta kore risku di dekai den eksagerashon i retórika.