6. Lírika sosial
Relashon kompliká den komunidad, industria ku inventonan moderno a owmenta e konflikto entre doño di trabow i obrero. Sindikalismo a organisa e obreronan, i esei a bin krea un ambiente di rábia entre doño di trabow i obrero.
Den nos komunidad tin e tragedia ku e obrero tabata ranká for di su bida trankil i bentá di un dia pa otro den industria. Esei sin duda a kita su ekilibrio. Ademas di esei rasismo, kompleho, deskriminashon i despresio di un pa otro a hinka mas palu bow di kandela.
Willem Kroon ta e promé persona ku a lucha ku su pen riba e terenu aki. Ya na 1926 el a publika su ‘Himno di Bond’, na okashon di promé lustro di Curaçaosche R.K. Volksbond; na 1930 su ‘Himno di motoristanan’ (dediká na chofernan di Liga San Cristobal). Ademas di esei e tabata para kla konstantemente pa kombati abuzu, den La Union i La Cruz, skibiendo na fabor di e obrero.
Despwes Guillermo Rosario den diferente di su obranan a sali na defensa di e ‘pober diabel’, ku ta sufri sin haña un luf pa bai dilanti. Ke men anto ku den lírika sosial nos ta topa ku ekspreshon di kompashon, di amor pa próhimo i tambe gritu di alarma kontra opreshon. Pa e poeta su ekspreshon den lírika sosial ta bira su lucha pa hustisia sosial, loke p'e ta kasi un ideal divino.
Den ‘Obrero, lanta’ (1969) di Rosario tin un ehempel kompletu di lírika sosial.
‘Marcha miserabel’ di Edw. de Jongh, publiká den e tomo ‘Capricho’ (1955) tambe ta un ehempel.
Auteursrechtelijk beschermd