Arte di palabra

4. Lírika di fe

Esaki no ta únikamente e poesia ku ta ekspresa un fe firme den Dios pero tambe tur arte poetiko ku ta dirigí na kosnan sobrenatural. Asta fálta di fe o ateismo un persona por ekspresa den tal fórma; aunke esei lo bira Iírika di fe negativo.

Ata un ehempel positivo:

Tres tret pa subi, nada mas!
Ma esta largu e kaminda ta
di aja bow te aki riba,
final dje gran trabow di bida!

Promé tin un flur kwadrá
ku kwadro blanku
i kwadro pretu, bon brasá,
i manera bela di granit,
e dos pilá, sosten di bida.

Un mesa simpel, símbolo
di sakrifisio i esfwerso.
l mas ariba, mas ariba,
te den laria ajá,
tin Lus!

(Luis Daal)

[p. 4]

Un ehempel negativo:

Mi ke kere,
mi ke tin sosten,
pasobra mi paden
ta grita ku konstansha,
pidi mediashon di un Dios.

Ma si mi weta kwantu kos
ta ruiná mi bida,
pordonami si mi duda
ku tin tata di bondad ainda.

Pordonami
si mi lanta reklama.
Tristesa ta komemi,
mi sintí ta shorotá ku fáha di doló,
i den abismo ku mi ta bentá
e wowo di mi alma no por mira
ni baranka ni tronkon
pa brasa den mi skuridad.

(P. Lauffer)

Den lírika di fe ku ta dirigi riba un Dios personal sa tin hopi variashon den obra di un poeta: Dwele di un maldad kometí, peso di piká, alegria di fe, speransa, gratitud pa un fabor risibi, resignashon, miedu di Kreador su hustisia, respet pa su mahestad.