Uit Roemer Visscher's Brabbeling. Deel 1

[p. 94]

Raetselen.

2.aant.

Bij daech ben ick meest bol en sacht,
De meeste verdruckingh lijd ick by nacht,
Twee goe lieven ploeghen op my om vrucht,
Sinte Luyerijns geselschap hout my in grooter waerden,
Mijn vel is vant meest lydende ghewas der aerden,
Mijn inghewant heeft vleys ghedraghen by de lucht.

Een bedde.

3.aant.

In my is gheblasen een levendighen Gheest,
Levendich nochtans heb ick noyt gheweest,
Met knurven ben ick ghechiert by de gront,
Boven het barckhout heb ick een gladde mont,
Ront ben ick als een omghekeerde clock,
Men siet deur en deur mijn clare rock,
Ick ben aendiender van de verdryver van rou,
Meer wort ick ghesoent dan eenighe Vrou,
Voort ben ick een lichter van de kan,
En die dit schreef was mijn ghenan.

Een Roemer.

5.aant.

Nieu ben ick heel wit, en ghebesicht vael,
Ick stoot seer dick teghen swarte custen,
Van binnen met hayr, en van buyten cael,
Het Gelderse oorloch comt met mijn rusten,
Die moede van leech gaen jaecht my met lusten,

[p. 95]

 

Herwaert en derwaert met een ghetralyde bril,

 

En die mijn jaecht staet selfs niet stil,

 

Voor al die haer op my willen gheneren,

 

Die moeten eerst al haer goet verteren.

Een Kaetsbal.

9.aant.

De Sone van diet al weet, heeft en siet,
Op de Werelt wesende en had my niet,
Mijn coleur is wit, root, groen, of paers,
S'nachts dien ick het hooft, en daechs de naers,
En als mijn naem een werck beduyt,
Ben ick de meeste lust op een nae van de Bruyt.

Een Kussen.

13.aant.

Janneken had (datse noyt voelde noch sach,)
Noch noyt wist sy waert stont of lach)
Een juweelken veel waerder dan gulden tresoren,
In een ooghenblick is sy dat gheworden quijt,
En die het nam creech niet eene mijt,
Dan moede lenden van zijn uytvercoren,
Nu segt toch wat dat sy heeft verloren?

Maechdom.

16.aant.

Recept voor een Vryster.
Neemt Meysgen d'eerste van een Meloen,
De middelst van Ham, de lest van Hoen,
Nutticht nae de const, alst behoort te wesen,
Gheen dingh en sal u bet ghenesen.