Platbook 1. Columns

[p. 22]

Frits Criens
Modertaal

Al minstes vieftieën jaor sjrief ich eder waek eine column in Dagblad de Limburger. In 't dialect van Hale. Modertaal hètj die rubriek. Ich merk aan de reacties det miense mien sjtökskes waardere.

't Zeen doorein lichte verhaole die dun bie de laezers sjtaon. Die ze bie wieze van sjpraeke zelf mèt haje kinne make, of in eder geval toch häöre buurman of häör buurvrouw. Verhaole van klein, herkinbaar leid. Klein, herkinbaar ergernisse of plezeerkes. Äöver miense wie de laezers zelf, mèt häör sjoeën en minder gooj kenj.

Waat mien laezers ouch aansjteit, is 't dialect. Want sjoeëns we oos modertaal de ganse daag kalle, is d'r neet väöl te laeze in die taal. De meiste Limburgers geit 't laeze van dialect troewes sjlecht aaf. Door de regelmaot van mien columns liere miense bietje bie bietje häör eige taal te laeze. Det is väör mich ein groeëte raeje väör die sjtökskes te sjrieve.

Väör ein taal te liere laeze, zeen korte, herkinbaar tekste ideaal. Ich maak dan ouch mèt opzèt gein ingewikkeldje zinne, gebroek gein ónnuedig gelierdje wäörd. Mer ouch gein kinjerechtige verkleinwäörd. Ich probeer de Limburgse maneer van zègke en oetdrökke in iere te haoje. De grammatica te respectere. Mer ich bèn d'r neet extra op oet väör aoj wäörd te gebroeke. De taal van mien columns mót taal van deze tied zeen, en väöral good, eige Limburgs.

[p. 23]

Woeë ich vies van bèn, is Limburgs det eigelik (sjlecht) vertaaldj Nederlandjs is. Waat ich daomèt bedoel? Loester en kiek nao väöl dialectsjpraekers op L1, loester nao väöl ‘dialectleedjes’ en tonieëlsjtökke in dialect. Jaomer genóg mót ich hie ouch sjrieve: laes väöl tekste die zich väördoon as dialect, mer die eigenlik eine hutspot zeen van Limburgs en abn.

Miense de kans gaeve väör häör eige taal te laeze, 't waeze van die taal mèt sjrieve in iere te haoje: daoväör publiceer ich de columns van Modertaal in Dagblad de Limburger. Riek waer ich d'r neet van en de hemel zal ich d'r waal neet mèt verdene. Mer 't hèltj mich in eden geval van de sjtraot.