De eerste Handelinghe. 6. VVtkomste.
Tusschen-sprake.
voorsichticheyt en gherechticheyt.
GHelijck de hardt-gheklipte Rotsen
Haer spitse door de Wolcken steeckt,
En ghelijck de blauwe schotsen
Ys int Noorden Schepen breeckt;
Alzoo een Achab zeer verhardt,
Door Godts goedtheydt niet vvil dalen,
Noch door dou beweghelick vverdt,
Als hy hoort Michás verhalen.
Ay vrome Vorst, vvat gaet u aen?
Dat ghy vvilt met Achab strijden;
Tgheen doch niet en kan bestaen:
Goede moeten quade mijden,
| |
'tKaf moet sich van Kooren zond'ren,
'tGoudt van 'tSchuym, 'treyn van't onreyn:
Dit moet u Mensch niet vervvond'ren,
Godt kent de syne maer alleyn.
Godt is alleen 'tvolmaecte Goedt,
Heylich, zuyver is syn vvesen:
De boose in syn sonden vvroet,
Gaet Godt noch syn Naesten vresen.
Achab kan in gheen rust dueren,
Of schoon de straffe op hem mickt,
Willich gaet hy zelfs vol-voeren
Tgheen dat Godt voor hem beschickt.
Als d'eerste eeuwe Godt vergramde,
Om het quaedt dat hem mishaeght,
Syn toorne heftich, vyerich vlamde,
Als hy't al met de Zundtvloedt plaeght,
De aerde swolgh in 'tergh ghespuys,
Den Hemel schreyt over de sonden:
Als Loth oock is gheleydt wt 'thuys,
Het vyer vier Steden heeft verslonden.
Dit Godtloos Kindt verblindt, en siet
Niet vvat hem over 'thooft mach hanghen:
Laes! ouden Man en siedy niet,
Den Sirier zal u leven pranghen,
Vreesdy niet syn harde Wapen,
Noch syn scherp ghestaelde Sweert,
Siet, een Pijl kan u betrapen,
Of een Steen u val begheert.
Gh'looft Micha niet, laet u verleyen,
Zedekia vrij gheeft veel moedts,
'tVerkeert oordeel zal u vvel vleyen,
Maer niet als ghy sinckt in u Koets,
Iemlaes Soon preeckt u het quaet,
Ick vveet tkan loghen niet behaghen,
De vvaerheyt is van zulcken staet
Datmen-se niet kan verdraghen.
Hier sietmen Godes vvonder-vvercken
Alsmen vvaerheyt niet ghelooft,
Een valsche Gheest zuldy dan mercken,
Die dan 'tdwase Volck verdooft,
Met heyl'ghen schijn van deucht versiert,
Die vinnich vvaerheyts glants kan knaghen:
Maer siet, haer vvimpel eeuwich swiert:
Dus straft Godt met verscheyden plaghen.
| |
Auteursrechtvrij