Levenders reden-feest, oft Amsteldams Helicon

Op-ghestelt By de Brabantsche Reden-Rijcke vergaderingh uyt Levender Ionst

[fol. I2v]

Balade.

COnst-lievers die de reen, en 't Redenrijck beminnen,
Dit volghend' vvyst u aen 't beheerschend' onverstant,
Oock hoe de reden can lof, prys, en Eere vvinnen
Door Sticht en kennis die zy in de herten plant,
Als vaeck ghebleecken is hier en in menich Landt,
Godtvruchtich, deft, in Liefd' door deugdelijc bemoeyen
Maer als men re'en met smaet veracht, bespot en schandt,
Hoe can heur name dan te recht in Liefde bloeyen?
Wt reden, reden blyct, en onre'en moetmen foeyen.
Dus siet Momisten roemt niet dat ghy red'naers bent,
So mach Rethorica te recht eens vveder groeyen,
Als elck hem self door-siet, als elck hem selven kent,
Maer die sich Reen-rijck noemt, en selfs de reden schent,
Onvvaerdigh is den naem van Reden-rijc te draghen,
Doch d'oude spreuck die leert en vvert vaeck voorghevvent,
Dat's eyghen lof die stinct, en can gheen prys begaghen.

Wie faelt mach keeren.