Levenders reden-feest, oft Amsteldams Helicon

Op-ghestelt By de Brabantsche Reden-Rijcke vergaderingh uyt Levender Ionst

[fol. H2r]

Bergen-op-Zoom, VVeldoen vervvint.

Refereyn op de Vraghe.

DOor lust tot Vryheyt groot, en ruste goet te comen,
Haect, tracht, en wenscht den Mensch altijt vry sonder schromen
Naer Vryheyt, Wet, en Recht van 't lieve Vaderlandt,
Ontsiet, swaert, dwanck, noch doot, maer stelt hem als den vromen
Hy spaert gheen goet, noch bloet, maer alles hy verpant,
Gheen coude, hit, noch dorst, gheen honger, vyer, noch brandt
Ontsiet hy, maer hy wilt zijn Lant van als bewaren,
Beschermt, beschut en vryt zijn Wetten met verstant,
Als nu ghebeurt, en was, seer langhe voor ons Jaeren,
Die hadden wil en lust, om vry zijn van beswaeren,
En sochten commer, angst, en smerte quyt te zijn,
Dit sal ick u hier nae int breede noch verclaren
Van 'sWerelts aenbegin, wat moeyte, noot, en pijn
Door lust is aenghewent, tot ruste mercket mijn,
Een yegelijck dit soeckt, 'tsy Vorsten, Graven, Heeren,
Een yeder een die tracht nae Vryheyts claeren schijn,
Door lust, tot rust, so vvijckt veel druck en swaer verseeren.

Nimrot door lust soeckt rust, en maeckt voor 's Waters vloeden

Een Tooren voor zijn rust, en wilt hem soo behoeden,
Siet Semiranus 't Wijf, die kloecke daden doet,
Bout Babilon tot rust, met lust haer daer toe spoeden,
Door lust, tot rust, soo docht haer dit te wesen goet
Te bouwen op een plaets daer rustet haer ghemoet.
Lubissa, oock een Wijf, 'tLant Bemen eerst ghewonnen
Regheert met lust Eerbaer, en rust daer nae seer soet.
Den kloecken Herculus, met lust cloeck heeft begonnen,
Vryt meest heel Grieckenlant, en heeft so willen jonnen
Sijn Ondersaten rust en vrede voor het quaet,
Merckt oock den grooten lust, onder den schijn der Sonnen
Van Coninck Codris trou, die hem als een Soldaet
Verclaert, om dat zijn doot aen d'overwinning staet,
Stelt hem door lust ten strijt, om ruste te vermeeren,
Verliest zijn Lyf, en blyft voor menigh Ondersaet
Door lust, door rust, so wijckt veel druck en swaer verseeren.

[fol. H2v]

 

Siet Darius grooten lust, en groote neerstigheden

 

Om 't briesschien van zijn Paert, als hy quam aenghereden,

 

Wiens Paert dat eersten briescht, met rust was Coninck daer,

 

Zapyros door den lust en groote vlytigheden

 

Tot winst van Babilon, brengt hem in dit ghevaer

 

Snijt Ooren, Lip, en Neus af, om dat hy daer naer

 

Sou rusten sonder moeyt, en zijn van druck ontslaghen.

 

Siet Xerxe brengt door lust een Heyr seer groot en swaer

 

Om zijn Monarch met rust der Werelt in zijn daghen.

 

Den Alexander groot, Magni, moet ick ghewaghen

 

Wat rust hy altijt had om wesen inden strijdt,

 

By nae der Werelt wijt heeft hy heel doen vertsaghen

 

Om comen soo tot rust, en een ghewenschten tijdt.

 

Herodes Antipas, wat lust hy breet en wijdt

 

Had tot ghewenschte rust, hooghloflijck t'synder Eeren

 

Sal de gheschiedenis u toonen wie ghy zijt,

 

Door lust, tot rust, so vvijckt veel druck en svvaer verseeren.

 

 

 

Prince

 

 

 

Scipio Africaen, door lust tot rust om vechten

 

Die van Carthago dwingt met Ruyters, Man, en Knechten.

 

Iulius Caesar cloeck, door lust, toont hem int Velt,

 

Om met ghewenschte rust daer nae veel uyt te rechten.

 

Augustus Keyser groot wert waerdigh hier vermelt,

 

Door lust zijn vyant dwingt, en hem in rusten stelt.

 

Titus Vespasiaen, door lust tot rusts ghewinnen

 

Verwist Jerusalem, en 't Lant in zijn ghewelt.

 

Siet Constantien de groot, door lust tot rusts beminnen

 

De Christenen eerst brengt, tot rust wilt dit versinnen,

 

Merckt Henri de Bourbon, den Coninck van Vranckrijck

 

Door lust, tot rust ten strijt, was d'eerst in het beginnen,

 

VVilhelmus van Nassau, Maurici van ghelijck

 

Verpanden goet, en bloet, en zijn in gheen beswijck

 

Door lust tot rust van't Landt den vyant cloecklijc keeren,

 

En vryden Vryheyts Wet, door lust al sonder wijck,

 

Door lust, tot rust, so vvyckt veel druck en swaer verseeren.

Weldoen verwint.