|
| |
| |
| |
Ané Doorson
Owpa Paulus
Te yu luku na tori krin, dan yu musu gi den sma leti te den ben e taki dati owpa
Paulus no ben de so switi na en ede-sei. Te yu ben sa aksi den san meki den e
taki so, no wan sma ben kan gi wan reti piki na tapu na aksi disi. Ma te yu ben
sa taki dati na yu firi owpa Paulus no law, wantron na heri prasi ben e dyompo
na yu neki: ‘No wan sma taki dati owpa Paulus law. En ede-sei no de so switi, na
dati wi e taki.’
Na bigin den no ben e taki so. Den ben e taki grat' ari dat owpa Paulus law. Na
di owpa Paulus srefi gi den fu frustan dati lawman e tan na kolera, meki den
drai mofo. Owpa Paulus no taki na sani so kowrukowru leki fa a skrifi dya. Na ai
| |
| |
di a ben luku na eri prasi nanga na fasi fa a ben ori na tiki,
di ben de tusyur na en anu, ben sori dati a no e go teki na nen fu lawman
kowrukowru. So meki no wan sma fu na prasi ben wani tyari nen dati na en gi owpa
Paulus na nen fu lawman. Den ala ben kon drai mofo taki: ‘A no de so switi na en
ede-sei.’
Na taki disi no ben e trobi owpa Paulus. Dat wan taki, noiti a meki den sma fu na
prasi firi dati na taki, disi a endri en. Moro fara srefi, te a ben yere dati
wan sma fu na prasi ben taki: ‘Libi en ba, pôti, a no de so switi na en
ede-sei’, dan a ben e poti wan laf'fesi leki fu taki: ‘Un taki san un wani. Fu
unu na wan rai, fu mi na wan sabi.’
No wan sma ben kan taki nanga reti pe owpa Paulus komopo, efu omeni yari a ben
abi. Den bigi-sma, di kebore na tapu na prasi fruteri dati den ai kon krin na
owpa Paulus tapu èn dati a sori dati owpa Paulus no e grani.
‘Sins wi sabi en na so a tan’, na so den ben e taki. Te sma ben aksi owpa Paulus
fu en yari, a ben e piki dati den yari di a de na grontapu no de fu en.
‘Na Gado abi den yari. So efu ini wan sma wan sabi omeni yari mi abi, meki a aksi
Gado.’ Nanga disi a ben e koti na tori.
Owpa Paulus no ben abi famiri. Dati wan taki noiti den sma fu na prasi si wan sma
kon luku en. En owpa Paulus fu en sei no ben e go na strati tu, boiti tudewroko.
Tudewroko na a dei di a | |
| |
ben e go pai fonsu. No aksi pe a ben e feni
na moni fu pai fonsu èn fu du ala den tra sani, leki bai krosi nanga nyanyan,
bika no wan sma fu na prasi ben kan piki na aksi disi. Wan sani den ben sabi,
bika a ben de fu si krin, èn dati na dati ‘baas’, di ben e piki yur' oso-moni gi
‘bigi m'frow’ fu fes'sei, noiti ben e go na owpa Paulus mofodoro.
Owpa Paulus krosi noiti ben doti na en skin. Ma dati no ben de wan rai, bika ala
wiki a ben e aksi wan tra sma fu na prasi fu wasi en krosi gi en. Den sma ben e
du dati sondro fu knoru. Wanwan leisi den sma fu prasi ben kan gi en wan mofo
nyanyan. Ma dati no ben e pasa furu leisi, bika owpa Paulus ben abi fut'man
trefu. So na pkinso nyanyan di a ben e kisi no ben kan ori en na libi. Ma toku
owpa Paulus ben luku krakti. Disi ben de wan rai.
Fu drai go baka na a bigin fu na tori. Yu ben musu gi den sma leti dati owpa
Paulus no ben de so switi na en ede-sei. Na gi-reti disi e poti mi na ini bigi
ferléigi, bika mi no kan taki nanga reti san meki mi gi den sma reti. Bika drai
en leki fa yu wani, te den sma ben e taki dati owpa Paulus no ben de so switi na
en ede-sei, dan den ben e bedulu dati owpa Paulus ben law. En leki fa na taki
de, dan lawman e beti sma yesi èn den e prei nanga den eigi morsu.
Owpa Paulus no ben e du no wan fu den sani disi. Moro fara srefi. A no ben e waka
nanga en | |
| |
ai piri na en ede, a no ben e waka nanga baka na strati, a
no ben e tak-taki nanga en srefi. Owpa Paulus no ben e du den speri tra sani di
sma e taki dati lawman e du. Wan sani ben tru èn dati na dati owpa Paulus no ben
de leki den tra sma fu na prasi. A no ben e taki leki den tra sma, a no ben e du
leki den tra sma. Tusyur owpa Paulus ben e kon nanga wan sani, di noiti ben kan
kon na wan trawan ede. A ben kan taki sani di trawan no ben abi dek' ati fu
taki. En disi ben sari kaba fu meki den sma fu na prasi taki dati a ben law, efu
fu safu en pkinso: ‘A no de so switi na en ede-sei.’
Owpa Paulus ben abi na gwenti tu fu taki nanga ala meti. A no ben kan pasa wan
meti sondro fu gi na meti odi; lagadisa, fowru, dagu, puspusi, kari a nen, ala
ben e kisi odi fu owpa Paulus. Den sma fu na prasi e fruteri dati wan dei owpa
Paulus miti wan owru-kuku- sneki na ini en oso. Den taki den yere fa owpa Paulus
aksi na sneki san a e du dya, èn efu na sneki firi dati na oso na fu en, dan en,
owpa Paulus, sa go na doro, libi na oso gi en. Den sma taki dati na tapu den
wortu disi a sneki kroipi safri go na doro, boro go na ondr' oso. Yu kan frustan
dati disi gi owpa Paulus wan tra nen na tapu di fu lawman.
Te yu ben aksi owpa Paulus fu san ede a de taki nanga meti, gi den odi, dan a ben
piki dati a abi respeki gi ala libisani, libisma so srefi meti, bika na a wan
Gado meki wi ala. Ala sma sa agri | |
| |
nanga mi dati disi a no
lawman-taki. Kontrari. Disi ben e sori wan dipi respeki èn dipi prakseri. Ma
toku owpa Paulus ben abi sani e du èn taki, di musu meki mi e gi den sma leti
dati a no ben de so switi na en ede-sei. Teki na ait-dei-neti fu Sa Jana. Sa
Jana di ben e wowoyo.
| |
II
Sa Jana ben e libi na tapu na prasi tu. A ben de wan tumsi prisiri uma. Ala
sma fu na prasi ben lobi en, funamku den pkin fu na prasi. Te Sa Jana ben
komopo na wowoyo - ala dei yu ben kan fruwakti en dri yuru bakadina kon miti
wan kwartiri pasa dri yuru - (te sonde, wowoyo ben e yagi fruku, dan tin
yuru a ben de na oso kaba) te Sa Jana ben doro so, dan na eri prasi ben de
na waya-waya. Na nengre-doro kaba Sa Jana ben e bigin fu bari wroko: ‘Mi
doro, mi doro! Dag alle mense, fa un tan. Fa un nyan a dei?’ Sa Jana ben e
meki leki wan sma di ben gwe fu wan langa ten, presfu wantu yuru fu na srefi
dei. Te Sa Jana ben bari wroko so, dan ala den pikin fu na prasi ben e lon
go miti en, bika ala dei a ben abi wan swit'sani fu gi den. Sa Jana srefi no
ben abi pikin. Den bigi-sma fu na prasi ben e kon na den dronmofo nanga
laf'fesi fu gi Sa Jana odi. En so Sa Jana ben e waka kon na tapu na prasi
leki wan kownu. A ben e tyari na wowoyo-baki leki wan kroon na en ede.
| |
| |
Na den yuru disi owpa Paulus ben e tanapu bak'kanti e luku san e go èn san e
kon. A sabi dati en libi ben seti. Sa Jana ben musu tyari wan sani gi en.
Disi ben e pasa ala dei. Kon miti sonde srefi. Efu a no ben de wan paki
blakatetei, wan anu bana-bakba, noso wan batra porter, dan a ben de wan bigi
kar'brede nanga pindakasi. Ma ala dei owpa Paulus ben kan fruwakti wan sani.
Te owpa Paulus ben kisi wan fu den sani disi, a ben e teki en nanga ala en
tu anu, drai en tiki go na en ondr'anu, drai na sani di a kisi na ala sei,
luku en, efu a ben de wan kar'brede a ben e piri en opo luku san de na ini
en bere. Te a ben kaba nanga ala den sani disi, dan a ben e opo en ai luku
loktu, taki wan sani di nowan sma oiti frustan. Dan fosi a ben e taki: ‘Gran
tangi fu yu, Sa Jana. Efu yu no ben de dan?’ Ma te fu owpa Paulus ben kaba
nanga ala den du disi, Sa Jana ben doro en dronmofo kaba nanga en dagu na en
baka. Na dagu ben nen ‘Vagebond’. Te den sma fu na prasi ben aksi Sa Jana
efu na fasi fa owpa Paulus e du no ben e meki en firi wan fasi, Sa Jana ben
e piki: ‘Libi en ba, en ede-sei no de so switi.’
Den gongosaman fu na prasi ben feni fu taki dati Sa Jana nanga owpa Paulus
ben abi ‘zaak’. Den trawan fu na prasi no ben e bribi na sani disi. ‘Owpa
Paulus so wan bigi man.’ Fu meki na tori moro switi, den gongosaman ben
fruteri dati den si owpa Paulus wan fruku mamanten, | |
| |
di a komopo
na Sa Jana oso. Na tru fu na tori de dati Sa Jana nanga owpa Paulus ben
kroisi pasi na mamanten dati. Owpa Paulus ben komopo na weisei èn Sa Jana
ben komopo na was'oso. Na sma di fruteri na tori si di Sa Jana ben e tapu en
doro na a srefi momenti di owpa Paulus ben e opo di fu en.
Den tra sma fu na prasi no ben teki na tori disi weri na den ede. San den ben
abi na den ede ben de dati owpa Paulus no de so switi na en ede-sei. En
nowan umasma sa wani abi wan sani fu du nanga wan sik'ede-man. Boiti dati,
Sa Jana eigi mofo tusyur ben e taki dati en nanga mannengre no abi tori.
Wantu man-nengre fu na prasi ben tyari taki na en. Ma soso kari. Sensi Sa
Jana kon libi na tapu na prasi - tin yari pasa - noiti den sma si a kisi
man-sma fisiti. ‘Baas’ di ben e piki yur'oso srefi no ben kisi wan tyans fu
kon na Sa Jana mofodoro, bika te yur'oso-wiki ben doro, Sa Jana ben e libi
na moni gi wan fu den sma fu na prasi fu pai gi en.
A wan enkri sma di ben e kon na Sa Jana dorodoro, dati wahi taki ala
mofonetie, ben de wan red'redi uma. Sa Jana ben e kari en ‘Mis Redi-Nette.’
Te Sa Jana nanga mis Redi-Nette ben e go na wan dansi efu wan ‘buitensport’,
den ben e weri parweri. Mis Redi-Nette ben e dyarusu gi Sa Jana. Na a dansi
na den tu ben e dansi. Noiti yu ben kan si wan fu den dansi nanga wan tra
sma, man efu uma. Den ben e dansi nanga | |
| |
den srefi, sidon na
wan aparti tafra, bai den eigi dringi.
Efu mis Redi-Nette ben sa kon tapu na prasi, èn si Sa Jana e taki nanga wan
fu den umasma fu na prasi, a sa koti ai gi na uma dati so, dati weerga no
de. So meki te mis Redi-Nette ben broko na nengredoro kon na tapu na prasi,
den umasma ben e tan fara fu Sa Jana dronmofo. A ben kon gersi dati ala den
sma fu na prasi ben kon frede mis Redi-Nette. Ala sma. Boiti owpa Paulus. Te
owpa Paulus ben si mis Redi-Nette e kon na tapu na prasi, wantron a ben e
bari gi Sa Jana taki: ‘Sa Jana-óóóó, yu kompe e kon!’ Bigin fu bigin na sani
disi ben e endri mis Redi-Nette. Ma di Sa Jana ben taigi en dati a no musu
luku so fini nanga owpa Paulus, bika a no de so switi na en ede-sei, mis
Redi-Nette no ben kon weri en srefi moro nanga den sani fu owpa Paulus.
Nanga wan ‘Dag mis, dag mis’ a ben e waka leki wan powisi - en alanya-tiki
na wansei fu en mofo - go miti na oso fu Sa Jana, di ben e kon na dronmofo
fu miti en.
We, Sa Jana disi ben kon dede.
| |
III
Na dede fu Sa Jana ben tyari wan sek'seki na tapu na prasi. No wawan fu di a
ben de wan prisiri uma, ma moro furu, fu di a no ben siki sref'srefi. Na dei
na fesi a ben komopo na wowoyo. Na | |
| |
seremoni fu ala dei ben go
leki fa na gwenti ben de. Wan sani no ben pasa: mis Redi-Nette no ben kon.
Ma dati no ben de wan fruwondru sani, bika a no ben kon wantu dei kaba. Sa
Jana ben fruteri den sma di ben aksi en, dati mis Redi-Nette ben go na boiti
fu du famirifanowdu. Na fruwondru fasi fu na dede fu Sa Jana meki den sma fu
na prasi bigin fu syusyu-syusyu. Te fu kaba, tori ben panya dati na wisi den
wisi Sa Jana. Sma ben sabi fu fruteri dati na uma di e seri sani na wowoyo
leti na Sa Jana sei, ben dyarusu. Den ben sabi fu fruteri dati den si na uma
dati nanga wan efektife wis'basi.
Fa a no fa, Sa Jana ben kon dede. Na mamanten, fu na dede di no wan sma yere
Sa Jana wiki - ala mamanten na prasi ben kan yere dati, bika Sa Jana ben abi
na gwenti fu prijse en Gado te a wiki, èn fu krutu nanga Vagebond, di heri
neti ben e tan na keti - na mamanten dati furu mannengre fu na prasi go lati
na wroko, bika na Sa Jana ben e wiki den nanga en singi. Di den sma no yere
Sa Jana wiki èn di dei krin, den si Vagebond tai na en keti ete, bruya ben
fadon na a prasi. Den sma ben sabi dati noiti Sa Jana ben abi na gwenti fu
sribi na strati. Alwansi olati wan dansi komopo, oto ben e tyari en kon na
oso. Skreki kon tapu den sma ati.
Ala sma fu na prasi di ben de na oso go tapu wan bromkidyari na Sa Jana
mofodoro. Den bigin fu kari: ‘Sa Jana, Sa Jana!’ Noti. Den naki | |
| |
na a doro. Pípí. Den sma bar'kari owpa Paulus, bika en ben de na wan
enkri mansma di ben de na oso. Nanga en srib'bruku èn sneis'bosroko nanga en
tiki na en anu, owpa Paulus lon kon na prasi.
‘San de fu du? San meki unu e bari mi nen so?’ Den sma fruteri en san den e
prakseri. Owpa Paulus no drai-drai. Nanga en tiki a weni na doro opo. Di den
sma doro na a sribikamra, Sa Jana ben e ari den kriboi bro. A no ben man
taki noti moro. Soso sori a ben e sori nanga en finga go na a kros'kasi.
Es'esi den sma gi en wantu spun watra. Nanga dati Sa Jana tapu en ai, sondro
fu taki wan wortu.
Now ala sma ben bruya nanga leti. Ala sma, boiti owpa Paulus. A bigin fu
singi wantron: ‘Wi skin na wan masanga. A no de ori langa. Wan broko-broko
oso. Wi lapu en fu soso.’ Den umasma ben e bari krei. So na owpa Paulus
wawan ben e singi.
Di den famiri kisi na boskopu, den doro. Den sma fu na prasi fruteri den dati
Sa Jana no taki no wan wortu, leki soso sori a ben e sori go na a kros'kasi.
Den famiri kon frustan dati na dape den fonsupapira nanga na lantibuku fu Sa
Jana musu de. Di den feni sortu sroto e fiti na tapu na kasi èn di den opo
na kasi, den feni ala den papira soleki fa den ben prakseri. Na fonsubuku
ben sori dati Sa Jana de na fesi nanga fonsumoni. So brok'ede no ben de.
| |
| |
Na treki di son wan fu den famiri fu Sa Jana kisi ben de fu trutru sari, bika
moni fu beri èn fu ori ded'oso ben de nofo. Sa Jana ben de na ini tu fonsu.
Na tapu fu disi a ben de na ini na ‘Marktvereniging’ tu, èn a ben e trowe
ebi kasmoni. Den wowoyosuma nanga den fonsu gi Sa Jana wan trutru beri. Na
tapu skowru - drage sobun - den tyari Sa Jana go na en grebi. Singi ben e
bari na strati. Ala sani ben e waka bun. Dati wantu drunguman ben de na baka
na beri no ben e endri noti. Mis Redi-Nette, di ben kisi moro kondoleri leki
den famiriman srefi, ben e waka leki nomru wan na baka den drageman. A ben
weri blaka nanga tapu-skinpanyi, bika na so en nanga Sa Jana ben pramisi den
srefi.
Owpa Paulus ben go na beri tu. Na ini na singi di ben e bari, yu ben kan yere
en sten na tapu di fu trawan. Di na beri ben libi tu uku fu doro ber'pe,
owpa Paulus aksi den drageman fu gi en wan brek. We, dan tori ben pori. Owpa
Paulus meki wantu futu drape nanga na drage na tapu en skowru, dati ala sma
fruwondru fu so wan owruman. Ala sma ben agri dati owpa Paulus ben meki moro
moi futu leki den drageman srefi. Ma den no fergiti fu taki: ‘Ala di a no de
so switi na en ede-sei.’ Den famiri fu Sa Jana ben prisiri nanga owpa
Paulus. Owpa Paulus ben de na loktu. Efu wan sma ben taki wan sani fu en,
wantron den famiri ben e teki en prati. Dati wan taki ala den dei na baka na
beri, boiti na ait' - | |
| |
| |
IV
Na ait'-dei-neti fu Sa Jana ben span sref'srefi. Na tapu na neti disi owpa
Paulus e go pori en papira na den famiri fu Sa Jana. Na a neti disi tu mi
ben kon gi de sma leti te den ben e taki dati owpa Paulus no ben de so switi
na en edesei. Fu di na oso ben pikin tumsi den sma ben ari wan tenti na
prasi fu ori na ait'-dei. Disi ben meki dati tu ‘voorlezers’ ben musu de tu.
Wan fu in'sei èn wan fu dorosei.
Na singi ben e go nanga speri. Te in'sei ben kaba singi, dan na ‘voorlezer’
ben e bari: ‘Buiten!’ En so te dorosei ben kaba, na ‘voorlezer’ dati ben e
bari: ‘Binnen!’
Ala sani ben e waka bun. Sek'sek-mofo ben de sref'srefi: sukrerki, asogri,
bor'buskutu, skrati, kofi. Ala den sani disi ben de fu naki dagu. Drang
nanga konjak, no fu taki.
Owpa Paulus ben de a man fu na neti. Den famiri ben e lai en nanga
nyanyansani. Wan sani a no ben wani, dati na tranga dringi. Wan porter so a
ben kan teki. Ma dran efu konjak dati a no ben wani. A ben de owpa Paulus
srefi di ben membre den famiri, dati den no musu fergiti fu poti kofi,
skrati, karu nanga den tra sani moro na baka oso gi na dedewan, ‘nanga den
trawan di sa waka na sargi Sa Jana baka.’ Den famiri, di ben fergiti na | |
| |
tori dati, ben aswa fu du san owpa Paulus ben taigi den. Yu
kan frustan dati disi opo owpa Paulus moro na ini den famiri-ai.
Owpa Paulus ben sidon na ondro na tenti na dorosei. A ben feni dati den
famir'man musu abi pasi na ini na oso. Ala yuru te a ben si den sma ben kon
na dorosei nanga wan braki na den anu, owpa Paulus ben e bari taki: ‘Na so
pataka taki, solanga watra de, wi de go!’ Den mannengre ben kon teki na sani
disi tu. So ala leisi te owpa Paulus opo en mofo fu taki: ‘Na so pataka
taki...’, dan wantu mannengre ben e teki abra, bari: ‘Solanga watra de....’
èn dan ala ben e moksi sten bari: ‘Wi de go-ooo.’ Bigi lafu ben e bari. Na
ait'-dei-neti ben kon gersi wan feryari-oso. Na so Sa Jana ben wani en.
Tusyur a ben e taki dati a no wani sari na en dede-oso. A musu de dati na
prisiri ben kon frei na owpa Paulus ede. A no ben kan de dat na drungu a ben
drungu, bika a no ben e dringi tranga-sopi. So efu a no prisiri ben drungu
en, dan na law a ben law fu taki san a taki.
Bunsibun owpa Paulus bigin fu taki wan weduwnaartori. Bigin fu bigin nowan
sma ben e frustan san a ben e taki, efu den ben e meki leki den no e
frustan. Owpa Paulus, di ben kisi pori na eri neti, èn di ben kon gwenti
dati sma e lafu te a taki wan sani, opo en sten bari aksi: ‘Pe na weduwnaar
fu Sa Jana de!’ Na presi kon kowru. Ala sma bigin fu luku den srefi. Mis
Redi-Nette, | |
| |
di ben e komopo na botri nanga wan braki skrati na
en anu, spikri na ini na doro. Wan bigi tiri fadon na ini na oso. Na ondro
na tenti ala sma ben e ori den bro. Wan fru wan den sma bigin suku mis
Redi-Nette nanga den famiri fu sargi Sa Jana nanga ai. Owpa Paulus luku
lontu. A taki: ‘San de fu du nanga unu? Mi no denki dati mi taki wan takru
sani.’ Efu a ben ori en mofo na baka disi, ala sani kande ben waka buri ete,
èn na tori disi no ben skrifi.
Ma no owpa Paulus. A ben musu go doro nanga san a bigin. A taki: ‘Mi aksi fu
si na weduwnaar fu Sa Jana, bika mi abi wan boskopu. Mi wani fu aksi en fu
taigi Sa Jana, dati te en, Sa Jana, sa dede wan tra leisi a no a fu kari mi
na en ait'-dei moro.’ Na tapu disi a bari wan bigi lafu. Naki en anu na tapu
en botu. ‘Kwakwa-kwa.’ Owpa Paulus wawan ben e lafu. Nowan tra sma ben e
lafu nanga en. Di owpa Paulus kon si dati, a bigin fu luku den sma
wanfruwan, te kon miti mis Redi-Nette. Alasei a ben e si swa fesi.
Owpa Paulus opo, a teki en tiki, a taki: ‘Efu un no wani mi na ini un
keselskap moro, dan mi sa gwe.’ A bigin fu waka fu gwe. Di a waka wantu futu
a drai kon baka. ‘Mis Redi-Nette, mi e begi yu, furu na batra disi gi mi
nanga kofi, fu mi kan abi fay’ watra tamara-mamanten.' Owpa Paulus no wakti
fu si san mis Redi-Nette sa du, ma a bigin fu furu na batra nanga den | |
| |
komtyi di ben de na tapu na braki di mis Redi-Nette ben saka
poti na tapu wan fu den sturu. Mis Redi-Nette ben wani ari na komtyi puru na
en anu, ma den sma fu na prasi kon taki nanga en. Den kon sori en dati a no
musu luku fini, bika owpa Paulus no de so switi na en ede-sei. Den taki dati
na fu dati ede a de taki sani leki te den tai wisiman na tetei.Di owpa
Paulus yere disi, a poti wan fu den laf'fesi fu en: ‘Fu un na wan rai, fu mi
na wan sabi’, dati a ben wani den sma frustan nanga na laf'fesi. Owpa Paulus
furu en batra te na a neki. Naki na korku steifi na a batra mofo. A poti na
batra na ini en saka èn a teki en ten waka gwe. Di a komopo ondro na tenti a
bari singi taki: ‘Wan broko-broko oso, wi lapu en fu soso.’
We, na den speri sani disi fu owpa Paulus, meki te yu luku na tori krin, yu
musu gi den sma leti te den ben e taki dati owpa Paulus no ben de so switi
na en ede-sei.
|
|
Auteursrechtelijk beschermd