Emblemata

[p. 3]

M.A.G. vvenscht den goetwillighen Leser d'opperste goet.

NA dyen ick, beminde Leser, ouergeset hadde d'Emblemata des Edelen, vermaerden, ende seer gheleerden Ioannis Sambuci, deur t'vermanen ende toestoken des ingenieusen ende gheleerden Cosmographen Abraham Ortels, mijnen bysonderen goeden vrient, dyen ickse oock alleene, gelijckse hem toebehooren, ghedediceert ende toegheeychent hebbe, ende ten costen des alderneerstichsten Printers Christoffel Plantijns, die ter liefden ende tot vorderinghe van alle studiosen in alderhande talen, behaluen sijnen aerbeyt, oock gheenen cost en spaert aen alle t'ghene dat tot verbeteringhe ende vercieringe der goeder boecken eenichsins dienen mochte, soo dat sijne wercken ghenoech betuyghen: Soo en heb ick niet connen ghelaten, ick en hebbe my oock moeten pijnen om des hoochgheleerden Medecijns, Philosoophs ende Historieschrijuers Adriani Iunij Emblemata, na mijn cleyn vermeugen in onser talen oock ouer te setten: alleenlijck verwect zijnde deur de fray

[p. 4]

inuentien, bevallicheyt, lichticheyt, ende dat t'meest is, volheyt van goede leeringe der seluer. Ende al heeftse d'Autheur int Latijn noch met gheleerde Commentarien verclaert, soo en heeft ons nochtans sulcx niet grootelijck duncken van noode zijn hier by te voeghen, aenghesien dat sy meestendeel claer ghenoech van haer seluen zijn, ende noch met die onderste vier Regelkens dichts sijn wtgheleyt worden. Aengaende den oorspronck, eyghendom, ende t'ghebruyck van aldusdanighe Emblematen, daeraf heb ick breeder ghesproken in mijn voorreden totten Leser op die voors. Emblemata Ioan. Sambuci, welcke oock dienen sal tot verstande van dese, ende alle dusdanighe Poëterie den ghenen diese noch onbekent is. Dus nemet in dancke, beminde Leser, ende leert met ghenuechten.

Den eersten Septembris. 1567.