Bonte blomme

[p. 136]

6. Keersnach.

Nach, zoe zwart, zoe dik van duuster,
Die ziech loem-zwoer veurtbeweeg,
Toch zoe vol van glans en luuster,
Straolend van oneindig Leech.

Nach, zoe stèl, zoe leeg van klanke,
Boe gei fluust're zelfs in dwaolt,
Toch zoe vol van 't jubel-danke,
Oet t'n Hiemel neergedaold.

Nach, zoe sjoever-kaajt, zoe errem
Aon get glood, boe hoop door bleujt,
Toch zoe vol van Leefde-werrem,
Die in 't Kribbeke ontgleujt.

Nach, zoe doeds, zoe zwoer-umweve
Mèt et kleid van dóffe rouw,
Toch zoe vol van hierlik Leve,
Us gesjónke oet Slevrouw.

Somberste van alle nachte,
Sjoenste nach van hiel et jaor!
Wou de wereld toch betrachte
't Leech van Bethlehem, zoe klaor,
Wou et minsdom toch begriepe
't Lofleed van de Ing'lerij,
Beter tijje zouwe riepe,
Riek aon Leefde, Leech en Vreij.

20 Dec. 1922.