Bonte blomme

[p. 121]

7. Trouw.

Nog is te politieke loch betrokke,
Nog hange donderköp in 't Zuid',
Die grommenteere samehokke,
Us dreigend mèt hun dóf geluid.....
Gein' noed! Ze zölle wel verdwijne,
Veurdat ze good zien oetgeraos,
d'Oranje-zon zal blieve sjijne
Op aajt Mastreech aon Holland's Maos.
Veer zölle ze vanein doen sjäöre
Door 't trille van eus jubelleed,
Tottat t'n horizon zal kläöre
En davere van euze kreet:
Trouw aon eus Limburgse landouwe,
Aon Holland trouw in vräög en noed,
Trouw aon Wilhelma van Nassouwe,
En trouw aon God tot in d'n doed!

Nog toe·te dèks te dissonante
Van vreigeleers us in de oer,
Nog sjik te leuge häör trawante
In Limburg rond van Geul tot Roer,
Nog zeuke deep-miskinde geister
Hun gif te keule op eus land,
En woort hun de verleiding meister,
Te zeje twiedrach, misverstand.....
Hun steuke zölver hun vergeve,
Mer et vergete doen ver neet,
En klinke zal hun hiel hun leve
Eus wachwoord, euze forse kreet:
Trouw aon eus Limburgse landouwe,
Aon Holland trouw in vräög en noed,
Trouw aon Wilhelma van Nassouwe
En trouw aon God tot in d'n doed!

Aug. 1919.