Een nieu devoot geestelijck lietboeck

Een nieu gheestelijck Amoreus Liedeken, Op de wijse: Mijn oochkens weenen, mijn hert moet suchten.

[p. 113]

 

BEdroefde herten wilt vreughden rapen,

 

Aensiet Godts schepsel int aerdtsche pleyn,

 

Hoe schoon en constich dat is gheschapen,

 

Denckt hoe schoon moet dan den schepper zijn.

 

Aensiet die cruyden seer groen uytspruyten,

 

Die daer genesen sieckte en pijn,

 

Aensiet haer schoonheyt en haer virtuyten,

 

Denckt hoe schoon moet haren Schepper zijn.

 

Aensiet de Lelien vol soete roken,

 

Tijmus, Lauender, Roosemarijn,

 

Aensiet de Rooskens seer wijt ontloken,

 

Denckt hoe schoon moet haren Schepper zijn.

 

Siet al die bloemkens met goet verstande,

 

Vol soete reucken en medecijn,

 

Siet haer couleur menigherhande,

 

Denckt hoe schoon moet haren Schepper zijn.

 

Aensiet die boomen met al haer vruchten,

 

En die wijngaerden met haren wijn,

 

Aensiet die voghelkens in der luchten,

 

Denckt hoe schoon moet haren Schepper zijn.

 

Siet die ghesteenten van grooter weerden,

 

Die claerder blijncken dan kristelijn,

 

Siet alle schoonheyt op deser eerden,

 

Denckt hoe schoon moet haren Schepper zijn.

 

Aensiet die menschen schoon van lichame,

 

Fraey van fatsoen en leden fijn,

 

Suyuer van aensicht ooghen bequaeme,

 

Denckt hoe schoon moet haren Schepper zijn.

 

Aensiet die Sonne en Mane schoone,

 

Aensiet die Sterren van claren schijn,

 

Siet hoe sy blijncken aen s’hemels troone,

 

Denckt hoe schoon moet haren Schepper zijn.

 

Siet ghy die werelt hier vol couragie,

 

Wiltse versmaden ghelijck fenijn,

 

Siet ghy haer schoonheyt en haer cieragie,

 

Denckt hoe schoon moet haren Schepper zijn.

 

Hoort ghy hier constich op Orghelen spelen,

 

Op instrumenten musijka deuijn,

 

Hoort ghy oock singhen met soete kelen,

 

Denckt hoe soet salt in den Hemel zijn.

[p. 114]

 

Hoort alle vreucht diemen mach bedrijuen,

 

Sy can maer dueren een cort termijn,

 

Denckt op die vreucht die eeuwich sal blijuen,

 

Voor haer die in den Hemel zijn.

 

Laet ons die werelt gheheel versaken,

 

Met al haer boosheyt naer Godts doctrijn,

 

Soo sullen wy in den Hemel smaken,

 

Hoe soet en schoone dat daer sal zijn.

 

Lof sy den Schepper der creatueren,

 

Die alle dinghen gheschapen heeft,

 

Gloria sy hem tot allen uren,

 

Diet onderhoudt en sijn voedtsel gheeft.