Een nieu devoot geestelijck lietboeck

Een nieu gheestelijck Liedeken, op de wijse Mijn droefheyt moet ic clagen, fortuyn is my geschiet.

ICk heb een lief op aerden,
Die mijn ionck hert aencleeft,
Een lief van grooter waerden,
Gheen schoonder daer en leeft,
Die my vercoren heeft,
Tot zijn Bruyt nv ter tijt,
Hem lof en glorie gheeft,

[p. 106]

 

Mijn lief gebenedijt.

 

Mijn siele wilt hem prijsen,

 

V Bruydegom vermeerdt,

 

En wilt hem eer bewijsen,

 

Certeyn hy ist wel weerdt,

 

Dus zijnen lof vercleert,

 

En sijn goetheyt belijdt,

 

Dit is wat hy begeert,

 

Mijn lief gebenedijt.

 

Mijn bruydegom vuytgelesen,

 

Dat is mijn scheper soet,

 

Mijn heer mijn Godt gepresen,

 

Die ick beminnen moet,

 

Want door zijn dierbaer bloet,

 

Soo heeft hy my bevrijt,

 

Hy is dat hoochste goet,

 

Mijn lief gebenedijt.

 

Ick sochte tot allen stonden,

 

Een lief in swerelts pleyn,

 

Nu heb ick een geuonden,

 

Inden Hemel certeyn,

 

Seer edel claer en reyn,

 

Is hy tot mijn profijt,

 

Hem beminne ick alleyn,

 

Mijn lief gebenedijt.

 

Siet bouen allen menschen,

 

Ick hem beminnen sal,

 

Want wat mijn hert can wenschen,

 

Dat vind ick in hem al,

 

Hier in dit aertsche dal,

 

Maeckt hy mijn sonden quijt,

 

Hy is zeer lief ghetal,

 

Mijn lief gebenedijt.

 

Sijn liefde maeckt my droncken,

 

En zijn goetheyt propijs,

 

Want hy heeft my gheschoncken,

 

Hem seluen tot een spijs,

 

Desen Bruydegom wijs,

 

Sal ick sien met iolijt,

 

In s’hemels Paradijs,

[p. 107]

 

Mijn lief gebenedijt.

 

Een Paradijs vol wellusten,

 

Heeft mijn schoon lief bereyt,

 

Daer sal ick by hem rusten,

 

Ghelijck hy selue seyt,

 

Sijn hooghe maiesteyt,

 

Sal ick daer sien met vlijt,

 

En alle die schoonheyt,

 

Van mijn lief gebenedijt.

 

Daer sal ick altoos leuen,

 

Met hem in grooter vreucht,

 

Want ick hem hem gegeuen,

 

Mijn trou wt goeder deucht,

 

Mijn maechdelijcke ieucht,

 

Houd ick voor hem met strijdt,

 

Hy is die my verheucht,

 

Mijn lief ghebenedijt.

 

Daerom sal ick bedwinghen,

 

Mijn vlees seer broos en cranck,

 

Om by mijn lief te singhen,

 

Den nieuwen soeten sanck,

 

Een suyuer wit cleet lanck,

 

Sal daer zijn mijn habijt,

 

Houdt my in v bedwanck,

 

Mijn lief ghebenedijt.

 

Prince der Seraphinnen,

 

Verlicht doch mijn verstant,

 

Dat ick v mach beminnen,

 

Met liefde abondant,

 

Brengt my int heylich lant,

 

Daer ghy nu selue zijt,

 

Mijn Bruydegom triumphant,

 

Mijn lief gebenedijt.