Een nieu geestelijck Liedeken, van die Maghet Maria, op de wijse: Den tijdt is hier, datmen sal vrolijck wesen.
GRoetse allegaer, die maget wt Jesse gesproken,
Die bloeme eerbaer,, suyuerlijck van coleur,
Met gracie claer,, menichfuldich ouergoten,
Sy is voorwaer,, die maechden eenen fleur,
Als Balsem en Caneel,, soo geeft sy soeten geur,
Sy is een bloem der bloemen goet,
Haren naem is om noemen soet,
O claer fonteyn, bidt voor ons algemeyn.
Schoon van cieraet,, zijt ghy schoo bloeme gepresen,
Liefelijck ghy staet,, in des Koninckx prieel,
Al v gewaet,, is Hemels wtgelesen,
Seer delicaet,, is v schoonheyt geheel,
Bouen Magdalena hebt ghy het beste deel,
O reyne maecht der maechden fier,
Die Godt sonderlinge behaechden hier,
Maechdelijck greyn, bidt voor ons algemeyn.
Hooch inden troon,, sijt ghy schoon bloeme verheuen,
By uwen Soon,, regneert ghy triumphant,
Dit is v loon,, eeuwich met hem te leuen,
In vreuchden schoon,, aen zijn heylige rechter hant,
Bouen die Engelen,, is uwen stoel geplant,
Ghy zijt wonderlijck verciert,
V feeste arm en rijcke viert,
In dit aertsche pleyn, bidt voor ons al gemeyn.
O Lelie net,, ghy sijt suyuer en puere,
| |
Gheheel sonder smet, roose van Jericho,
Schoone violet,, v leuen is een figuere,
Ons tot eenen Spiegel geset,, o Maria virgo,
Tot v soo roepen wy,, kinderen van Eua,
Weerdige Princersse fijn,
Wilt toch ons voorsprakersse zijn,
Want wy zijn cleyn, bidt voor ons al gemeyn.
|
|
Auteursrechtvrij