Een nieu devoot geestelijck lietboeck

Een ander Gheestelijck nieuwe Liedeken, dat men mach singhen ouer tafel, tot leeringhe van een gheestelijcke Bruydt: op den dach als sy Jesum

[p. 93]

voor haren Bruydegom ghetrouwt heeft, op de wijse: Den winter is nu gheleden.

Bruydt Christi wilt te recht beminnen,
Den Bruydegom die ghy nu hebt ghetrouwt,
Wijsselijck wilt beghinnen en versinnen,
Hoe dat ghy hem best behaghen soudt
Siet dat ghy op gheen driftighen grondt en bouwt,
Maer op een vast fondament,
Soo en wordt ghy niet bedroghen, afghetoghen,
Van v goedt voornemen excellent.
Op oodtmoedicheydt wilt fonderen,
Die daer is het beste fondament,
Soo sult ghy perseuereren vol herderen,
En alsoo crijghen een salich ent,
Oodtmoedicheyt brenght voort alle deughden ient,
Men van gheen ander deughdt en leest,
Aen die moeder ons Heeren suldy leeren,
Hoe dat sy oodtmoedich is gheweest.
Weest onnoosel en simpel van seden,
En bemint die deught van suyuerheyt,
Waeckt neerstich in alle steden met ghebeden,
Uwen lieven Bruydegom verbeyt,
Die alle maeghden eenen spieghel voorleyt,
Waer in dat ghy claerlijck mooght sien,
Hoe dat ghy v sult draghen, en veriaghen,
Al dat quaet is schouwen en vlien,
Weest voorsichtich en schamel int spreken,
Dat die maeghden sonderlingh betaemt,
Let neerstich op v ghebreken, laet ons ontsteken,
In v herte Godts liefde hooch ghenaemt,
Op dat ghy als die dwase niet en wordt beschaemt,
Maer meucht hooren dat lieflijck gheluyt,
Comt mijn schoon vriendinne, die ick beminne,
Comt mijn duyue mijn uytvercoren Bruydt.
Princersse wilt volherdich blijuen,
In desen maeghdelijcken staet,
Wilt hem te recht aenclijuen, en verdrijuen,
Die v tot eenen anderen raedt,
Want desen alle staten te bouen gaet,
Die hem te recht wel onderhout,

[p. 94]

 

Uwen loon uytghelesen die sal wesen,

 

By den Bruydegom hondertfout.