Een nieu devoot geestelijck lietboeck

Een Liedeken, Op de wijse: Bedroeuich herteken wat moet ghy lijden.

In alle tijden sal ick v prijsen,
Mijn Godt en Schepper ghebenedijdt,
V sal ick dienen en eer bewijsen,
Want ghy mijn Heer en verlosser zijt.
Aensiet het schepsel van uwer handen,
My v dienersse en ionghe maeght,
Wilt my bewaren in alle landen,
Voor alle het ghene dat v mishaecht,
Leert mijn ghedachten en mijn nature,
Mijn hert en sinnen mijn wille fris,
Om v te dienen wt liefden puere,
In eenen staet die my salich is.
Eerbaerheyt reyne sal ick beminnen,
Suyuerheyt als eenen grooten schat,
Om die croone des leuens te winnen,
Hier bouen in die Hemelsche stadt.
Mijn lieue minnaer seer hooch verheuen,
Jesum mijn Bruydegom triumphant,
Gheefe my v graci om wel te leuen,
Met v te woonen int heylich Landt.
In die schoon Hemelsche stadt hier bouen,
Syon dat nieuwe Jerusalem,

[p. 74]

 

Gheeft Heere dat ick v daer mach louen,

 

Met blijder herten en soete stem.

 

Nae dese stadt haeckt mijn siele ghepresen,

 

Nae v Fonteyne des leuens goet,

 

O Heere wanneer sal ick by v wesen,

 

Om te aenschouwen v aenschijn soet.

 

Kinderen die inde woestijne d’walen,

 

Die haecken seer naer haers vaders huys,

 

Soo haeck ick nae die Hemelsche salen.

 

Want dese werelt is my een cruys.

 

Een dinghen heb ick begheert soo seere,

 

Dat sal ick soecken al ben ick cranck,

 

Met v te woonen mijn Godt en Heere,

 

In v huys alle mijn leven lanck.

 

Niemant en can mijn ionck hert versaden,

 

Mijn siel vervullen met soete vreucht,

 

Dan ghy mijn Bruydegom vol ghenaden,

 

V reyne liefde my seer verheucht.

 

Laet my v dienen oprecht en stille,

 

En voor die werelt zijn onbekendt,

 

Leert my te leuen naer uwen wille,

 

Dat ick mach hebben een salich endt.

 

Om v te dienen alle mijn dagen,

 

Is mijn begheerte vroech en laet,

 

Dus wilt my trecken naer v behaghen,

 

Tot eenen goeden bequamen staet.

 

O Heer mijn Godt ghy siet mijn ghebreecken,

 

Ghy kent mijn crancke natuere broos,

 

Wilt mijn herte met v liefde ontsteecken,

 

Dat ick versmade dees werelt boos.

 

Door uwen Heylighen Gheest seer crachtich,

 

Stort in my wijsheyt nacht en dach,

 

Dat ick mach kiesen den staet waerachtich,

 

Daer ick bequaem v in dienen mach.

 

Tot desen staet wilt mijn herte trecken,

 

Mijn siel verwecken Prince eerbaer.,

 

Maeckt my reyn suyuer schoon sonder vlecken,

 

En wilt bedecken mijn sonden swaer.