Een nieu devoot geestelijck lietboeck

Een nieu gheestelijck Liedeken, op de wijse: Tis heden den dach van vrolijckheyt, oft, Dies est letitiæ.

JErusalem wilt opstaen,
wordt verlicht door desen,
Want v licht is opghegaen.
Wt Jacob ghepresen,
Schijnt een sterre schoon en claer,
Die de Heydenen voorwaer,
Sien in hare Steden,
Den Coninck van hoogher aert,
Is ons nv gheopenbaert,
Op den dach van heden.
Dese Sterre triumphant,
Staet tot zijnen prijse,
Schoon in Orienten lant,
Verlicht sy de wijse,
Dat sy comen soecken ras,
Die gheboren Coninck was,
Met vrolijcke seden,
In die Stadt Jerusalem,
Vraechden sy neerstich nae hem,
Op den dach van heden.
Waer is gheboren fris,
Was haerlieden vraghen,
Die Coninck der Joden is,
Sijn sterre wy saghen,
Schijnen claer in oostenrijck,
Tis een teecken wonderlijck,

[p. 33]

 

Vanden Heer der vreden,

 

Wy comen met gauen sier,

 

Om hem te aenbidden hier,

 

Op den dach van heden.

 

In Bethleem slecht en cleyn,

 

Hebben sy gheuonden,

 

Met wat grooter vreuchden fijn,

 

Saghen sy dat kindedijn,

 

Schoon en reyn van leden,

 

Met zijn lieue Moeder bly,

 

Haer schatten openden sy,

 

Op den dach van heden.

 

Met wat grooter weerdicheyt,

 

Vielen sy ter eerden,

 

Voor zijn hooghe Maiesteyt,

 

Die groot is van weerden,

 

Goudt, Wierooc, en Myrrhe goet,

 

Offerden sy met ootmoet,

 

Sy hebben aenbeden,

 

Dat cleyne kindeken teer,

 

Als haer Coninck Godt en Heer,

 

Op den dach van heden.

 

Heden is gheopenbaert,

 

Christus onsen Heere,

 

Den Vader heeft hem verclaert,

 

Met hoocheyt en eere

 

Door zijn Vaderlijcke stem

 

Den Geest Godts daelden op hem,

 

Int water beneden,

 

Heeft hy zijn Doopsel ontfaen,

 

Den Hemel is gheopent saen,

 

Op den dach van heden.

 

Jesus eerste teecken siet,

 

Dat hy dede seer crachtich,

 

Is als heden oock gheschiet,

 

In Cana waerachtich,

 

Daer hy quam ter bruyloft soet,

 

Met zijn lieue iongeren goet,

[p. 34]

 

Wel terecht met reden,

 

Wort zijn glorie nv vermeert,

 

Water is in Wijn verkeert,

 

Op den dach van heden.