Longhen sweeringhen ghenesen.
DIe luchtsinnige Herbaristen meynen, dat Eeren prijs ghedistilleert met wijn eens of tweemael overghehaelt, is goet gedroncken voor quetsuren of sweeringhen der Longhen.
Neemt Bastaert en doeter wat ghedroochden saffraen onder, dit is goet ghedroncken voor ongesonde Longhen.
Cardo benedictus ghepulveriseert met wijn inghedroncken, gheneest de Longhen.
Pastinaken peen wel gestooft en wat suyckers by ghedaen, ghenesen de Longhen.
Peper gestooten ende met Honich of Syrope ingeslickt, geneest de vercoude ghequetste Longhen.
Drooghe Vijghen ghebraden of rau ghegeten, of met Ysope ghesoden ende ghedroncken, genesen die sweeringen der Longen, of Syrope van Ysope gheslickt, dient tot het selfde.
Betonie in wijn ghesoden ende ghedroncken met wat suyckers, gheneest de Longhen.
Soete melck ghekoockt met wat suyckers ofte room, is goet voor de ghequetste Longhen.
Neemt eenen doyer van een rau eye, doeter wat suyckers onder, dit is goet voor de Longhen.
Auteursrechtvrij