Den schat der armen oft een medecijn-boecxken

Ghevallen van hooch ghenesen.

GAnserick ghenaemt Argentina, in Bier ghesoden met wat souts ende ghedroncken, is goet voor de gene die ghevallen heeft.

Den gemeenen raet is. Neemt Crappe, Oly, ende Walscot met werm Iopen Bier inghedroncken, gheneest van't vallen.

Item assche van Lindeboom hout, met ghebotert bier, werm inghegheven, helpt den ghevallen.

Soo mede boter met andere dingen ingegeven, wildy met ghestooten Pier-wormen, gheneest wel den ghenen die ghevallen heeft.

Gloeyende Eycken Colen in witte wijn gelest, drinckt dese wijn smorghens heet, het helpt.

Een werme jante ghemaeckt van goet Bier en Boter, met gheschrabde groene Kase heet ghegeten, gheneest ende versaecht de pijn van't vallen.

Neemt Agrimonie, Confilie, Salie, elcx een hant vol, siet dit in Mey boter, tot datse groen wordt,

[p. 79]

wringhet deur ende nutticht drymael daechs in bier en broot oft pottagie twee lepel vol t'seffens, het sal helpen met Godts gratie, maer soo't niet en helpt soo purgeert met vercoelende dinghen, op datter gheen Cortse toe en slae.