Den schat der armen oft een medecijn-boecxken

Camergangh weeck en sacht maken.

ALssem wijn gedroncken maeckt openinghe.

Violetten cruyt of matelieue bladeren ghesoden ende ghedroncken, maeckt camergangh.

Neemt Manna twee Oncen gesmolten, in eenen teugh werm Bier ghedroncken, maeckt camergangh sonder sorghe.

Soeten Way met Suycker daghelijcx gedroncken, ende veel voechtighe spijse ghegheten, maeckt sachte camergangh.

Iongh bier met honich gesoden, ende gedroncken, maeckt openinghe.

Alloy een half loot inghenomen, maeckt camergang, oft pillekens ghemenght van Alloy en deur gheswolghen met een omgekeerde Pruyme, of een weynichsken ghebraden Appels, maeckt openinghe van camergangh.

Lattou ghestooft met Boter, ende ghegheten, maeckt openinghe.

Gebraden Ajuyn gegeten, met Olie ende Azijn, maeckt openinghe.

Suere Appelen ghebraden ende ghegeten, dient om openinghe te maken van camergangh.

Cassia Fistel ontrent een Once swaer inghenomen, maeckt camergangh sonder sorghe.

[p. 58]

Rogghebroot gekoockt met Bier ende veel Boters ende Suycker, ende soo gegeten, maekt openinghe van Camergangh.

Desghelijcx Vijghen gegeten laxeren wel. Ofte langhe ende soete Pruymen van Damast gekooct ende ghegheten laxeren wel.

Kerssen en Kriecken gegeten, openen den buyc.

Neemt een vierendeel Pruymen van Damast wel ghekoockt en de steenen wt gedaen, en doeter dan een vierendeel loots Senepoeder toe met een stuck Boter, dit werm met malcanderen gegeten, maeckt rustigh camergangh.

Rauwe Eyeren ghegheten maken openinghe.