Den schat der armen oft een medecijn-boecxken

Van slapen ende waken.

DOor den slaep wordt den mensch ververst, die sinnen worden verfraeyt, het ghemoet wordt gheconforteert, de naturlijcke hitte wordt vermeerdert, de humeuren worden ghetempert, die spijse ende dranck wordt verteert, ende het herte wordt verlicht. Ende ghelijck natuerlijcken slaep ghesont is, soo is te veel slapens ende buyten tijdts quaedt, want het brenght aen Popelsie, vallende evel, gichte, ende doet dickwils absteunien ende cortsen groeyen. Ende oock onghemaniert waken verdrooght het lichaem, het vermindert die verdouvinghe, ende is oorsake van veel sieckten. Terstont

[p. 13]

naer den eten salmen niet slapen, maer men sal wat exercitie doen met gaen, staen, oft arbeyden tot dat die spijse wat ghesoncken is, want die spijse sal te beter verteert worden, ende minder beswaren. Men magh oock musijck, oft sanck, oft genoeghlijcke historien aenhooren, oft wat ander oeffeninghe doen elck naer sijne ghelegentheydt, want terstondt naer den eten gheslapen, maeckt pijne in't hooft, ende brenght aen catarren, ende bederft de nature: beter waer't voor den eten gheslapen, nochtans dat een mensch ghewent is dat is hem best, onghewoont is quaet. Den slaep begintmen op de rechter sijde, soo wordt de spijse te beter verteert. Daer na op de slincker zijde. Ende die handen cruys-wijs, alst cout weder is, op die mage geleyt. Men sal gheensins met den buyck opwaerts slapen, want dat maeckt verschricktheydt, rasernije ende Popelsije. By daghe te slapen is onghesondt, want den dagh is verleent om te wercken, ende de nacht om te slapen. Latouwe dient oude menschen wel om te slapen.