Oeuvres complètes. Tome V. Correspondance 1664-1665

N^o 1260.
P. Petit à Christiaan Huygens.
17 octobre 1664.

La lettre se trouve à Leiden, coll. Huygens.
Chr. Huygens y répondit par le No. 1265.

A Paris le 17 Octobre 1664.

Jl paroit bien que nous ne nous aymez plus gueres puisque vous ne nous faictes plus scauoir de vos nouuelles. pour Moy aussitost que le Retour de Monsieur vostre Pere¹⁾ m'en a donné le Moyen vous voyez comme je m'en acquitte. Vous scaurez

1) Constantyn Huygens, père, revint d'Angleterre le 11 octobre 1664 [Dagboek].

[p. 124]

donc par ce billet cy que je suis graces a dieu en bonne sante comme aussi Ma femme & Ma fille qui sont en Touraine despuis deux Moys & Reuiendront dans le prochain. dans le sejour que je fais icy seul Je M'occupe a quelques Machines & automates & ay fait faire vne Montre de pochette qui marque sans aucune confusion ny augmentation de Roues que de 2 ou 3 petites tout ce que font les grandes pour les lieux du soleil & de la lune & autres choses. Si Je scauois vostre nouuelle jnuention de pendule²⁾ Je lappliquerois de vostre consentement a vn que je desire faire faire en grand marquant les mesmes choses. Monsieur vostre Pere Ma dit que vous lauiez faite executer. si cela est & quil vous aye reussy Je vous prie de nous le Mander. Monsieur Theuenot & Auzout lattendent aussi bien que Moy, nous continuons nos petites assemblees les mardys & faisons tousjours quelque chose quoy que petite.

Monsieur Vossius nen manque gueres & Monsieur Borrischius³⁾, Monsieur Bourdelot⁴⁾ nest pas encores de Retour des eaux de bourbon. Jl se fait icy vne chose presentement assez curieuse dont Je ne scay si vous scauez le secret qui est d'jmprimer vne taille douce sur le verre, non pas comme vous pouuez penser de la faire passer sous la rouleau & sur la planche de Cuiure, Mais de Mettre la taille douce desia jmprimee & quoy que vielle sur le Verre & faire en sorte quelle y laisse tous ses traits noirs. Cela est fort joly & ne scay comment cela se fait. jl y a vn homme ov deux seulement a Paris qui le scauent. Monsieur de Montmor se promet de l'apprendre & le descouurir, cela est dautant plus beau que lon ne fait que peindre sur lesdits traits tout dvne couleur & que cela paroist fort bien fait, a cause que les traits seruent dombre. comme ce que la Cour & toutes les femmes ont fait despuis quelque temps sur les tailles douces vernies de therebentine pour les rendre transparentes, comme je croy que vous auez veu faire auant vostre despart.

Pour reuenir a vostre Pendule Je vous prie si cela se peut & que vous n'en veuilliez pas faire vne affaire & vn secret de me le mander en cas que vous layez esprouué meilleur & plus auantageux en quelque chose que le premier. Thuret a Mis en pratique le sien quil dit auoir bien reussy & a trouué le Moyen de l'auancer ou retarder sans changer la situation de ces deux boules desia equilibrees, en haussant ou abbaissant les piuots du Mouuement de son fleau de balance auec vne vis. Jl ny a qu'une chose qui me choque la dedans qui èst que la difference est trop petite pour satisfaire aux vibrations diuerses de tant de Mouuemens & au lieu des 4. 5. & 6 pouces de difference de longeurs des pendules que nous auons suiuant les battemens des palettes & Roues de Rencontre Jl ny aura pas des demy quarts de lignes. Ce

2) Consultez la Lettre N^o. 1253.

3) Olaus Borch (Borrichius) naquit le 7 avril 1626 à Riben (Jutland) et mourut à Copenhague en 1690. Devenu en 1660 professeur de philosophie, de chimie et de botanique à Copenhague, il voyagea beaucoup, prit ses grades à Angers, guérit une princesse de Medicis, et, revenu en son pays, fut nommé en 1655 bibliothécaire, en 1686 membre de la Cour suprême. Il fonda le Collegium Medicum pour les étudiants sans fortune.

4) Pierre Michon.

[p. 125]

qui me fait craindre que pour les petites montres jl ne reussisse pas si bien que pour les grandes ou jl faudroit 3 ou 4 pieds de longeur de pendule. nous le verrons auec le temps & par la suitte. Cepandant vous m'en direz sil Vous plait vostre sentiment & du vostre.

On parle fort icy de la jonction des deux Mers Oceane & Mediterranee par les Riuieres de Narbonne & par la garonne. Jen ay donne Mon aduis dont Je vous enuoyray vne Copie⁵⁾ si je la puis faire jmprimer. Ce sont des desseins ou peut estre des visions qu'on Renouuelle de Regne en Regne. Messieurs des Estats de languedoc dont les deputez sont icy & qui en poursuiuent lexecution au Conseil eussent bien desiré que Jeusse este sur les lieux Mais a Moins dun commendement du Roy & dvne bonne ordonnance Jayme Mieux Me reposer que de courir en cette saison & a Mon age pour le public qui d'ordinaire n'est quun sot.

Pour les lunettes nous y trauaillons tousjours & essayons des verres de nos nouuelles verreries qui nont pas encores fait de Miracles. vous auez veu aussi bien que nous a ce que Ma dit Monsieur vostre Pere lescrit⁶⁾ de ce nouueau lunetier de Rome Joseph Campanus qui a obserué Saturne auec des Ombres telles que vostre Hypothese les demande & Juppiter auec deux Manches ou ombres de ses satellites comme porte sa figure⁷⁾. de la quelle si vous nauiez eu Copie Je vous lenuoyrois. on nous a aussi enuoyé les Obseruations de ces Satellites du Moys entier de septembre dernier, saites a Rome sans discontinuation dun seul Jour, si vous les desirez vous nauez qua me les Mander comme aussi tout ce qui sera en ma puissance vous estant entierement acquis & a toute vostre famille que Je vous prie de saluer de Ma part & me croire entierement

Vostre tres humble & tres obeissant seruiteur Petit.

A Monsieur Monsieur Christian Huggens de Zulchom. A La Haye.

5) Voir l'ouvrage cité dans la Lettre N^o. 1078, note 2.

6) Consultez la Lettre N^o. 1248.

7) Voir la planche vis-à-vis de la page 118.